29
Sa Kinorokorotae Tadi pa Zerusalema
1 Mamu talotaṉa si agoi, Arieli, Arieli,
sa vasileana nomana te Devita!
Vuaheni na vuaheni
si tavete pilipulei agoi sari na totoso inevaṉa.
2 Ba kote la Arau meke va kamo nia tinasuna sa popoa Zerusalema;
kote kabo si asa meke lukalukana,
kote na hope si asa sapu tale eharana.
3 Meke Arau si kote na mua kana,
kote vari likohae nigo Arau meke raza igo,
meke huari sari mua goba.
4 Na ta huara gore, ke pa pepeso kote koa meke zama mae;
sari mua zinama si kote qumiqumi mae gua pa kavuru.
Sa mamalaiṉimu si kote vura guana tomate pa pepeso;
pa kavuru mae gua sari mua zinama sapu manamanasa toa.
5 Ba sari mua kana si kote ta evaṉae na kavuru,
sari dia tie varipera variva matagutudi si kote paleke taloani na givusu.
Kote hodahodaka mo, pa totoso hite,
6 si kote kamo mae se Zihova Tadi na Qeto Minate,
turaṉae paka maṉauru, niu, meke na mamalaiṉi lavata,
turaṉae givusu, raneboṉi meke na nika halalana.
7 Ke sari doduru qeto minate tadi hopeke butubutu pu razana se Arieli,
pu rapatana si asa meke sari nana popoa ta gobadi,
si kote guana pinutagita mo,
guana keke dinogodogorae pana boṉi.
8 Gua na tie oviana sapu putagita nia sapu henahena si asa gua,
ba sipu vaṉunu sa si ovia eko mo si asa;
gua na tie memehana sapu putagita nia sapu napo si asa gua,
ba malohoro tu totoso vaṉunu sa, sina memeha eko mo si asa.
Ke kote gua asa sari na qeto minate,
pu mae raza ia sa Toqere Zaione.
Lopu Ta Galagalae sari na Vina Balau
9 Mi magasa mate si gamu, mi duvili mia,
koromia va hinokaria, mi behu mia;
mi viviri, ba lopu pa napo vaeni,
mi tedeve, ba lopu pa napo bia.
10 E Zihova si va rorodoko gamu pude mi puta muliuṉu:
Ele va opoi Sa sari mata mia, sapu sari poropita.
Ele hadei Sa sari batu mia, sapu sari na tie dodogorae.*Rom 11:8
11 Sapu koa gamu si sari ginuadi ri na dinogodogorae si loketoṉa ba na zinama mo sapu ta tokoro va nabudi pa pepa ta viqusuna. Meke be vala nia gamu sa pepa pa keke tie tumaena tiro meke zama si gamu koasa, “Tiro ia si hie,” si kote olaṉa si asa, “Lopu boka si rau sina ta tokoro va nabuna.” 12 Babe vala nia gamu sa pepa ta viqusuna koa sa pu lopu tumaena tiro, meke zama, “Tiro ia si hie,” si kote olaṉa si asa, “Na lopu tumae tiro si rau.”
13 Zama se Zihova,
“Sari tie hire si mae tata koa Rau pa ṉuzu dia mo,
va lavata Au rini pa beru dia,
ba sari bulo dia si seu hola koa Rau.
Sa dia vinahesiqu Arau
si luli gua mo koari na vina turu sapu taveti na tie.*Mt 15:8-9; Mk 7:6-7
14 Gua ke kaqu va hodahodaka pulei Rau sari tie hire
koari na vinari va magasa, pude madi magasa;
sa ginilagilana tadi tie gilae si kote ta huara,
meke sa tinumatumae tadi tie tumatumae si kote murimuri.”*1 Kor 1:19
Rinoverove sapu Kote Leana Vugo Repere
15 Mani talotaṉa sarini pu va tasuna puleni
pude tomei sari dia hiniva koe Zihova,
sarini pu tavetavete pa totoso huporo meke balabala guahe,
“Esei dogoro gita? Esei gilania?”
16 Gamu pu va iliri eṉai sari ginugua,
sapu sa raro patu si gua tugo sa tie tavetena!
Vea, pada pude zama sa tie koasa pu va podakana,
“Lopu asa tavete au,” gua?
Vea, boka zama sa raro patu koasa pu tavetena,
“Loketoṉa si tumae nia sa,” gua?*Ais 45:9
17 Pa vasi totoso hite mo sa soloso hiqohiqo pa Lebanoni si kote ta evaṉae na pepeso masuruna tana inuma,
meke sari inuma masurudi si kote hiqohiqo soloso pule.
18 Koasa rane asa si sari tie nuli si kote avosi sari zinama koasa buka,
meke sari tie behu pu koa koasa opoadumu meke hinuporo si kote dodogorae.
19 Saripu va pepekae si kote qetu pule koe Zihova;
Saripu loke dia si kote qetu pule nia si Asa pu Hopena pa Izireli.
20 Sari tie ṉoṉovala si kote lopu koa,
sari tie va sisire si kote murimuri,
meke doduru pu doṉo hata ia sa kinaleana si kote tava mate.
21 Sarini pu vekoa pa sinea sa tie toṉoto pa dia zinama,
pu va sosode kokoha pa vinari pitui,
meke sarini pu tavete sinekesekei pude sosoara ia sa hinokara pa vinaripitui.
22 Gua asa ke, se Zihova pu harupu vagia se Ebarahami, si zama guahe koasa tutina e Zekopi,
“Se Zekopi si lopu kote koa kurekure kamahire;
sari isumata dia si lopu kote doṉo matagutu kamahire.
23 Pana dogori rini sari na dia koburu,
sarini pu taveti Rau pa Limaqu,
si kote vahesia rini sa Pozaqu Hopena;
kote vahesia rini si Asa pu Hopena pa Izireli,
meke pamaṉa nia sa Tamasa te Zekopi.
24 Sari tie duviduvili pa maqomaqo dia si kote vagia rini sa ginilagilana;
sarini pu nominomi si kote va tabea sa vina tumatumae.”