40
Keke Kinera Vinahesi
(Keke kinera te Devita)
1 Aqa va ṉoṉo nia rau se Zihova, meke toka nau Sa.
Doṉo mae au Sa meke avosia Sa sa qua tinepatepa.
2 Va vura pule au Sa koasa pou gulazorona,
meke koasa kopi kosikosirina.
Va turu au Sa si rau pa keke vasina ṉiṉirana,
ke lopu matagutu si rau pude hoqa pa tinasuna.
3 Va tumatumae nau Sa si keke kinera vaqurana,
na kinera vinahesina sa nada Tamasa.
Pana avosia na dogoria rina tie si matagutu meke kekere,
meke kalavarae koe Zihova.
4 Tamanae tugo sa tie pu kalavarae koe Zihova,
meke lopu luli rini saripu vahesi pule ni,
meke sarini pu vahesi sari na tamasa kokohadi.
5 Ke Zihova, mami Tamasa, soku hola sari na Mua tinavete pu tavete ponini gami Goi.
Agoi mo sina Tamasa hinokara.
Be hiva tozi rau sari na Mua tinavete koa gami, ba lopu boka tozi betoi rau,
sina lopu boka ta nae si arini.
6 Ba poni nau Goi sa taliṉaqu pude va avosigo, ke kamahire si gilania rau,
sapu lopu hiva nia Goi sa vina vukivukihi na vinariponi pa hope,
sa vina vukivukihi vina uququ
babe na vina vukivukihi vinulasa sinea si lopu qetu nia Goi.*Hib 10:5-9
7 Meke tiqe zama si rau, “Hiera si rau Qua Tamasa,
gua sapu ta kubere sa guguaqu rau koasa buka ta viqusuna.*Ais 10:5
8 Kei, qetu nia rau pude tavetia sapu gua hiva nia Goi.
Gilana valeania na va naqitia rau sa Mua tinarae pa buloqu!”
9 Ke Zihova, ele tozia rau pa vinarigara tinoni,
sa inavoso leana sapu harupu gami Goi,
meke gilania Goi sapu lopu makudo tozia rau si asa.
10 Lopu tomea rau pa buloqu sa Mua tataru variharupi,
ba tozi helahelae nia rau sa Mua tataru nabuna meke sa Mua hinarupu.
Lopu tomea rau koari na tie pa vinarigara nomana sa Mua tataru nabuna na tinaharupu!
11 Zihova, hiva nia rau sapu lopu hite makudo sa Mua tataru variva taleosae koa rau.
Mamu kopu nau na va sare au koasa Mua tataru nabuna ninae rane.
12 Sari na tinasuna si varidikue nau,
soku hola si arini meke lopu boka ta nae.
Ta pusi si rau koari na qua sinea,
ke lopu boka gilania rau sapu pavei si kote govete la gua rau.
Soku hola ni rini sari na kalu pa batuqu,
meke tava malohoro si rau.
13 Ke Zihova, Mu harupau, Mamu va sare au,
Mu tuturei toka nau, ba Zihova.
14 Madi tava kilasa na tava nunala gedi sarini
pu korapa podekia pude va mate au.
Madi tava kekere pule taloa na talotaṉa gedi sarini
pu hiva vata sigitau.
15 Zama sarini, “Dotu, isara, sari na mua sinea!” gua,
si madi tava nunala gedi pa dia kinurekure.
16 Ba sari doduru pu hata igo si kaqu koa qetu koa Goi,
Meke sarini pu qetu nia sa Mua tinaharupu,
si madi zama, “Tava lavata sa Tamasa!” gua.
17 Habahuala na malaṉa si rau, ba lopu muliṉi nau Goi.
Agoi si na qua tinokae na qua vinasare,
ke, qua Tamasa Mu tuturei mae toka nau.