50
Sa Vinahesi Hinokara Koe Tamasa
(Keke kinera te Asapa d)
1 Sa Tamasa ṉiṉira hola,
e Zihova si tioki sari na tie pa popoa pepeso,
podalae pa gasa rimata meke kamo pa lodu rimata!
2 Sa Tamasa si ṉedala vura mae pa Zaione,
sa vasileana lavata sapu gotogoto mate pa Nana tinolava!
3 Korapa mae sa nada Tamasa,
ba lopu mae golomo,
keke nika huruṉuna si koa pa kenuna Sa,
meke na raneboṉi ṉiburuna si koa pa vari likohaena Sa.
4 Tiokia Tamasa sa Maṉauru panaulu meke sa pepeso,
pude kekeṉoṉo Nana tie va sosode pana varipitui ni Sa sari Nana tie.
5 “Mi varigara mae koa Rau,
gamu doduru qua tie tava madimia.
Gamu sapu somana tavetia sa vinariva egoi koa Rau pa vina vukivukihi.”
6 Sa maṉauru si tozi vura nia sa Nana tinoṉoto,
ura telena e Zihova sina tie varipitui.
7 “Kei Izireli, gamu na Qua tinoni,
Mi avoso mae, meke kaqu zama si Rau,
kaqu tozi vura ni Rau sari na mia sinea.
Arau se Zihova, sa mia Tamasa.
8 Lopu nore gamu Rau pa ginuadi rina mia vina vukivukihi,
meke koari na mia vinariponi vina uququ pu paleke mae ni gamu doduru totoso!
9 Ba lopu okoro nia Rau si pude paleke mae nia gamu si keke bulumakao kokoreo,
babe keke qoti pa mia bara.
10 Ura sari doduru kurukuru pa hiqohiqo si Taqarau,
meke sari na rovana bulumakao koari na tina toqere.
11 Sari doduru kurukuru tapuru pa galegalearane,
meke sari doduru kurukuru ṉame pu koa pa pepeso si Taqarau!
12 Be ovia si Rau,
lopu kaqu tepa koa gamu!
Ura sa kasia popoa meke sari doduru pu koa vasina si Taqarau!
13 Vegua, hoke hena masa bulumakao na napo ehara qoti si Rau?
Lokari!
14 Mu ponia koe Zihova sa vina vukivukihi zinama leana,
mu va gorevura i sari na mua vina tatara koasa Tamasa Ululuna Hola!
15 Mu tepa mae koa Rau pa rane tinasuna,
meke kaqu va sare igo Rau,
pude boka va lavatau,” gua se Zihova.
16 Ba koari na tie kaleadi si zama guahe sa Tamasa,
“Lopu garo si pude zama ni gamu sari na Qua tinarae,
babe vivinei nia sa Qua vinariva egoi.
17 Ura lopu hiva tava tumatumae si gamu,
meke kilui gamu sari na Qua tinarae.
18 Pana dogoria gamu si keke tie hikohiko si baeria gamu si asa,
meke koa somanae si gamu koari na tie barabaratadi.
19 Doduru totoso si tupiti nia mo gamu si pude zama ni sari na zinama kaleadi,
meke lopu hite pamaṉa nia gamu si pude zama kokoha.
20 Tupiti nia mo gamu si pude zutui sari kasa tasimia,
meke pude hata vura ni sari na dia sinea.
21 Evaṉi mo gamu sari doduru pu gua sara,
ba lopu kulu si Rau.
Gua asa ke balabala ia gamu,
sapu gugua mo gamu si Rau, gua.
Ba kamahire tu si Maqu gegesi gamu,
Maqu va bakala atuni gamu sari na mia sinea.
22 Mu avoso mae ia si hie,
agoi pu muliṉi Nau,
be lopu avoso goi si kote va kilasigo Rau,
meke loke tie kaqu harupigo.
23 Asa sapu ponia sa vina vukivukihi zinama leana koa Rau,
si va lavata Au;
ke kaqu vata dogoro nia Rau sa qua hinarupu koari doduru pu va tabe Au!”