51
Tinepa Tinaleosae te Devita Koe Tamasa
(Sa vinaravara te Devita sipu barabarata si asa koe Batisiba meke zutua sa Poropita Netani si asa koasa nana sinea.)*2 Samuela 12:1-15
1 Ke Tamasa, Mu tataru nau pa korapa Mua tataru nabuna.
Pa korapana sa Mua tataru variva taleosae
si Mu va via au koari doduru qua sineke tinarae.
2 Mu va mate pani sari doduru qua kinaleadi,
Mamu va via au koari doduru qua sinea.
3 Ura gilani rau sari na qua sineke tinarae,
meke sari na qua sinea si ta dogoro va bakala koa rau.
4 Koa Agoi mo, uve, koa Agoi mo
si ele tavete va sea si rau,*Rom 3:4
meke ele tavete va kaleana si rau pa kenumu Agoi.
Ke toṉoto sa Mua zinutu koa arau,
meke lopu sea sa Mua vinilasa.
5 Sipu podo rau si ele koa nana koarau sa kinaleana.
Pa tiana sa tinaqu ba koa nana koa rau sa sinea.
6 Na hinokara mo si hiva nia Goi pa bulo tie,
ke Mamu va dogoro nau sa Mua tinumatumae pa korapa buloqu.
7 Mu va mate pani sari na qua sinea,
meke kaqu koa via si rau.
Mu va via au, meke kaqu keoro hola nia rau sa sinou.
8 Mu va siṉi nau qinetuqetu;
pa mudina sa qua tinahuara
sapu ele evaṉa nau Goi
pude maqu koa qetuqetu pule qua.
9 Mu lopu doṉo la i sari na qua sinea,
ba Mu va mate pani sari doduru qua kinaleadi.
10 Kei Tamasa, Mu poni nau sa bulo viana,
Mamu vekoa koa rau sa maqomaqo ṉoṉo sapu soto va nabu koa Agoi.
11 Mu lopu hitu pani au koa Goi,
Mamu lopu vagi pania sa Mua Maqomaqo Hope koa rau.
12 Mu poni pule nau sa qinetuqetuna sa Mua tinaharupu,
Mamu toka nau pude qu okoro va tabe hinokarigo.
13 Meke kaqu tiqe va tumatumae ni rau koari na tie sea sari na Mua tinarae,
pude madi kekere pule atu koa Goi si arini.
14 Kei Tamasa, Mu harupau koasa sinea vina mate tie;
sina Agoi sa Tamasa tana qua hinarupu.
Meke kaqu kera vura nia rau sa Mua tinoṉoto.
15 Ke Baṉara, Mu toka nau
pude maqu zama vura nia sa vinahesimu Goi!
16 Lopu okoro nia Goi sa vina vukivukihi meke na vinukivukihi vina uququ,
ba be hiva nia Goi ba ele tavete vatu nia tu rau,
ba lopu kaqu qetu nia Goi.
17 Sa qua vina vukivukihi sapu variva qetu koe Zihova,
si na maqomaqo va pepekae.
Lopu kaqu kilua Goi sa bulo
sapu kekere na va pulepaho.
18 Kei Tamasa,
Mu tataru nia na toka nia sa popoa Zaione.
Mu kuri pulei sari na bara na gobana sa vasileana Zerusalema.
19 Meke kaqu tiqe qetu ni Goi sari na vina vukivukihi tana tinoṉoto,
meke sari na vina vukivukihi vina uququ vasina.
Meke kaqu tava vukivukihi sari na bulumakao kokoreo koasa Mua hope.