57
Tinepa Tinokae Koe Tamasa* 1 Samuela 22:1, 24:3
(Keke vinaravara te Devita sipu govete nia sa se Saula koasa bae.)
(1 Samuela 22:1, 24:3)
Mu taleoso nau pa Mua tataru, Kei Tamasa,
Mu taleoso nau.
Ura koa Goi mo si aqorae si rau kekeṉoṉo guana kurukuru
pu va aqori sari na tuna pa kauru tatapuruna
si gua tugo sapu aqorae si rau koa Goi,
osolae hola sa tinasuna pa tinoa.
 
Tepa la si rau koasa Tamasa pu Ululu Hola koari doduru,
koasa Tamasa pu va gorevura i sari doduru qua hiniva.
Kaqu olaṉa mae si Asa pa Maṉauru pude harupau.
Kaqu va kilasi Sa sarini pu kukiti nau.
Kaqu va dogoro nau Sa sa Nana tataru nabuna,
meke kopu ni Sa sari Nana zinama.
 
Koa si rau pa varikorapadi ri na kana, pu guana laione variva matedi,
sari na livodi si ṉaru guana tupi na hopere,
sari na meadi si ṉaru guana magu varipera.
 
Kei Tamasa, Mu koa tavalavata si Goi panaulu pa Maṉauru!
Sa Mua minataqara si mani ta dogoro pa doduru kasia popoa.
 
Sari na qua kana si tavetia si keke sipata pude vagi au,
talotaṉa hola si rau.
Gelia rini si keke pou pude va hoqa au, gua,
ba hoqa pule tugo teledia koasa pou asa.
 
Kei Tamasa, raṉeraṉe valeana qua si rau,
ke kaqu kera vahesi Igo rau si Goi.
Maqu vaṉunu meke kera,
maqu kera vahesia pa mike,
maqu kera vahesia sa Tamasa pana munumunu vaqavaqasa.
 
Kei Baṉara, kaqu zama leana si rau koa Goi pa varikorapadi rina butubutu,
ke maqu kera vahesi Igo rau si Goi pa vasina koa sari na tinoni.
10 Ura sa Mua tataru nabuna si kamo la koari na Maṉauru,
meke sa tina ronuemu si kamo la koari na lei.
11 Kei Tamasa, Mu vata dogoro nia sa Mua linavata koa sa Maṉauru,
meke sa Mua ṉiniraṉira pa doduru kasia popoa.

*^ 1 Samuela 22:1, 24:3