56
Sa Vinaravara Kinalavarae Koe Tamasa* 1 Samuela 21:13-15
(Totoso tuqea rina tie Pilisitia se Devita pa vasileana Qati)
(1 Samuela 21:13-15)
Kei Tamasa, Mu tataru nau, ura rapata nau rini;
ta ṉoṉovala si rau koari na qua kana doduru totoso.
Doduru rane si rapata nau rini si rau.
Sokudi arini si varipera mae koa rau.
Kei Tamasa, pana matagutu rau,
si kalavarae si rau koa Agoi.
Koe Tamasa mo si kalavarae rau, ke lopu kaqu matagutu si rau.
Vahesi Igo meke raṉei rau sari na Mua zinama;
loketoṉa si kaqu boka tavete nau keke tie pa pepeso,
 
Sari na qua kana si va tasunau ri doduru totoso,
doduru totoso balabala hatai rini si kaiqa siraṉa pude va sigitau.
Varigara si arini meke tome nau rini koari na vasidi tometomeana.
Kopukopu nau rini koari doduru qua tinavete.
Hiva nia rini pude va mate au.
 
Kei Tamasa, va kilasi gedi koari na dia kinaleadi,
va gore pani sari na tie sara pa Mua tinaṉaziri.
 
Gilani Goi sari na qua tinasuna,
balabala i Goi sari na kolomataqu.
Kuberi Goi si arini pa mua buka.
Koasa rane pu tioko atugo rau,
si kaqu kekere pule sari na qua kana.
Gilania rau si hie,
ura na somana koarau sa Tamasa.
10 E Zihova sa Tamasa si vahesia rau
koari Nana vina tatara.
11 Koa Sa si kalavarae rau ke lopu hite matagutu.
Nasa si kote boka tavete nau rina tie?
 
12 Kei Tamasa, maqu evaṉa vura ni sari na qua tinokotokoro.
Maqu ponigo sari na qua vina vukivukihi zinama leana koa Goi.
13 Ura ele va sare au Goi si rau pa minate,
meke kopu ni Goi sari na nenequ pude lopu hoqa,
pude qu ene pa kenumu Goi Tamasa pa korapa kalalasa.

*^ 1 Samuela 21:13-15