55
Vinaravara te Devita pu Ta Ṉoṉovala Koa Keke Nana Baere
1 Ke Tamasa, Mu avosia sa qua vinaravara,
Mu lopu kiluia sa qua tinepatepa.
2 Mu va avoso mae au. Mamu olaṉa mae au,
sina ele tava malaṉa si rau pa qua tinasuna,
3 koasa halabutudi ri na qua kana.
Ura na ta ṉoṉovala si rau koari na tie kaleadi.
Meke bugoro nau na kukiti nau rini.
4 Matagutu na tarazuzu sa buloqu,
meke sa tinasuna tanisa minate si naqotau.
5 Minatagutu na ziziziri si rau,
tava kilasa pa tinaduaṉa sa tiniqu.
6 Kei, be ari tatapuruqu gua mo na kukuva,
maqu tapuru taloa qua pa seu,
maqu la koa magogoso qua.
7 Uve, maqu tapuru va seu la qua pa soloso qega,
maqu la koa qua vasina.
8 Maqu tuturei la hata ia si keke qua aqoroana
pude qu tome koari na qua kana,
arini pu guana givusu pa raneboṉi.
9 Kei Baṉara, Mu huara pani gedi sari na dia minizimizi,
sina dogoria rau sa vinari kakatorae na ṉinovaṉovala pa korapana sa vasileana lavata.
10 Rane na boṉi si ene vari likohae si arini panaulu koari na gobana sa vasileana,
evaṉi rini pa korapana sa vasileana sari na tinasuna na ṉinovaṉovala.
11 Na tinahuara si koa pa korapana sa vasileana;
soku hola sari na ṉinovaṉovala na sinekesekei koari na siraṉa koa sa vasileana.
12 Be guana qua kana si ṉoṉovalau na va sisire nau,
si boka va kamoi rau.
Be na kana sapu kukiti nau meke varipera koa rau,
si kaqu tome nia rau si asa.
13 Ba agoi mo, na qua baere soti,
na turaṉaqu, meke na tie gua mo arau.
14 Gita mo sapu hoke baere valeana,
meke hoke ene varigara la pa vinahesi pa vetu te Tamasa.
15 Madi mate makamakata gedi sari na qua kana,
madi gore la gedi pa vasina tadi na tie matedi sipu lopu ele mate rini.
Na kinaleana si koa koa ri na dia vetu soti meke pa bulodi.
16 Ba tepa la si rau koe Zihova sa Tamasa,
meke kaqu harupau Sa.
17 Sari na qua tinalotaṉa si va sage la i rau koa Sa,
pana munumunu, korapa rane, na veluvelu;
meke kaqu avosia Sa sa mamalaiṉiqu.
18 Rapata varikali nau rina qua kana si rau,
ba kaqu va sare au Sa, meke lopu kaqu ari bakoraqu.
19 Sa Tamasa sapu koa totoli ninae rane ka rane,
si kaqu avosau si rau meke kaqu va kilasi Sa sari na qua kana;
sina korodia hobei rini sari na dia tinoa
meke korodia pamaṉa nia rini si Asa.
20 Sa qua baere koana mo si rapata ni sari nana baere,
ke kumatia sa sa nana vina tatara.
21 Sa nana vivinei si memehe hola nia sa bata,
ba sa bulona si siṉia na kinukiti,
sari nana zinama si lomoso guana oela olive,
ba variva bakora guari na magu ta avaṉana si arini.
22 Mu vala i koe Zihova sari na mua tinasuna,
meke kaqu toka nigo Sa;
lopu kaqu va malumia Sa pude tava kilasa sa tie toṉoto.
23 Ba kaqu va mate makati Agoi Tamasa sari na tie variva mate na kokohadi sara,
pude gore la pa vasina tadi na tie matedi,
sipu korapa tie vaquradi si arini.
Ba arau si kaqu kalavarae koa Agoi.