54
Vinaravara pude Ta Harupu koari na Kana
(Vinaravara te Devita sipu qoraia rina tie pa Zipi totoso koa tome si asa pa dia popoa.)*1 Samuela 23:19, 26:1
1 Ke Tamasa, Mu harupau,
Zihova, Mamu vata rupahau pa korapa Mua ṉiniraṉira.
2 Ke Tamasa, Mu avosia sa qua vinaravara,
Mu va taliṉa maei sari na qua zinama.
3 Sari na tie karovodi si korapa mae pude rapata au;
sari na tie variva mate pu lopu korapa pamaṉa nia sa Tamasa si korapa podekia pude va mate au.
4 Ba sa Tamasa si na qua tinokae,
Asa si na qua Baṉara meke na qua lave.
5 Mani tavetavete ni Tamasa sari na dia kinaleana soti teledia pude va kilasi sari na qua kana.
Kaqu va huara ineti Sa si arini, sina ta ronuena si Asa.
6 Ke Zihova, kaqu poni moka nigo rau si keke vina vukivukihi.
Kaqu vahesigo rau, sina na Tamasa leamu si Goi.
7 Ura ele va sare au Goi si rau koari doduru qua tinasuna,
meke dogori rau sapu ele tava kilasa sari na qua kana.