53
Sa Kinaleana tana Tie
(Keke kinera te Devita)
1 Na tie duvili si zama guahe pa bulona,*Rom 3:10-12
“Loke Tamasa si koa,” gua.
Sarini pu zama gua asa si na tie kaleadi.
Tavete va sea sisigiti si arini,
meke lopu keke arini si evaṉia gua sapu leana.
2 Doṉo gore mae pa Maṉauru koari na tie pa pepeso sa Tamasa,
pude doṉo hata ia keke sapu gilae meke hata ia sa Tamasa.
3 Ba ele ene sea meke bureṉe beto sari doduru,
meke lopu hite keke arini si tavetia gua sapu leana,
namu loketoṉa hokara!*Rom 3:10-12
4 Zama sa Tamasa, “Loke dia ginilagilana sari kasa tie kaleadi hire,
pu va murimuri pani sari na tie Taqarau,
Kekeṉoṉo gua sapu gani va murimuri rini sari gedi ginani,
meke lopu hite varavara la si arini koa Rau,” gua si asa.
5 Ba kaqu tava tarazuzu va kaleana si arini,
sapu lopu ele hoke gugua visoroihe.
Kaqu va hurakataei Sa sari na susuridi rina kana tadi nana tie.
Kaqu va kurekurei goi si arini,
ura ele etulu pani Tamasa si arini.
6 Mani vura mae mo pa Zaione sa tinaharupu tadi na butubutu Izireli.
Pana va mamutu pulei e Zihova sari na Nana tinoni Izireli,
si kaqu qetuqetu hola si arini.