63
Saivi Hataia Sa sa Tamasa* 1 Samuela 23:14
(Keke vinaravara te Devita sipu koa si asa pa soloso qega pa Ziuda.)
1 Ke Tamasa, Agoi mo sa qua Tamasa;
saivi hataigo rau si Goi.
Doduruna sa qua tinoa si okoro pude dogorigo;
kekeṉoṉo gua sapu memeha nia rau sa kolo pa popoa popana
si gua tugo sa maqomaqoqu si memeha nigo.
2 Mu vata dogoro koa rau pa Mua vasina hopena,
Mu va dogoro nau sa Mua ṉiniraṉira meke sa Mua tinolava soti.
3 Sina sa Mua tataru nabuna si leana hola nia sa tinoa;
ke maqu vahesi Igo.
4 Kaqu zama leana si rau koa Goi pa doduruna sa qua tinoa,
kaqu va sagei rau sari na limaqu na vinaravara pude vahesi Igo.
5 Sa maqomaqoqu si kaqu qetu na qetu guana tie sapu deṉa pa ginani,
kaqu vahesi Igo rau si Goi koari na kinera qetuqetu.
6 Sipu eko si rau pa qua teqe,
si balabala pulei rau sari na Mua tinokae koa rau;
doduru boṉi si va nonoga Igo rau si Goi pa buloqu.
7 Ura Agoi mo sa qua tinokae doduru totoso.
Ke kaqu kera qetuqetu Nigo rau koasa Mua kinopu koa rau pa kauru tatapurumu Goi ta kopue si rau.
8 Koa soto va nabu koa Goi si rau,
sa Mua ṉiniraṉira si tuqe au na va sare au.
9 Ba arini pu hata au pude va mate au gua,
si kaqu gore la pa vasina tadi na tie matedi.
10 Kaqu tava mate si arini pa vinaripera,
Meke kaqu gani rina kurukuru pinomo sari na tinidia.
11 Ba sa baṉara si kaqu koa qetuqetu koe Tamasa pu va mataqaria si asa.
Sari doduru pu veko vina tatara koa sa pozana e Zihova si kaqu vahesia si Asa,
ba sari na tie kokoha si kaqu tava noso.