62
Raṉea sa Kinopu te Tamasa
Ura e Tamasa mo telena si aqa va ṉoṉo nia rau mae guana koa Sa sa qua tinaharupu.
Asa mo telena sa qua patu aqoroana meke na qua tinaharupu.
Lopu kaqu hite tava kilasa si rau.
 
Vea seunae gua si kaqu rapata nia gamu sa tie
sapu malohoro gua na bara ta huarana?
Hiva va gore pania mo gamu si asa pa nana tuturuana ta pamaṉaena,
qetu nia gamu sa kinohakoha.
Zama ni gamu sari na zinama tamanaedi,
ba pa korapa bulomia si leve nia gamu si asa.
 
Koe Tamasa mo telena si kalavarae rau
va sotoa rau koa Sa sa qua rinoverove.
Asa mo sa qua patu aqoroana meke na qua tinaharupu.
Asa si na qua bara heheda,
ke lopu kaqu tava kilasa si rau.
Sa qua tinaharupu meke na qua vina lavata si koa mo koasa Tamasa.
 
Ke gamu na qua tinoni,
Mi kalavarae koe Tamasa doduru totoso.
Mi tozi lani koa Sa sari doduru mia tinasuna,
Ura Asa mo sa nada aqoroana.
 
Doduru tie si guana keke siniṉo mo,
hiteke na lavata si loke laedi,
Veko lani koasa padapadana mamata,
mamu dogoria sapu namu loke hite vasi mamatadi si arini,
mamahelo hola nia rini sa siniṉo.
10 Mi lopu kalavarae koasa ṉinovaṉovaladi;
mi lopu rovea sapu kaqu vagi nia keketoṉa gamu sa hinikohiko na huhuara.
Be guana soku sari mia tinagotago,
ba mi lopu va sotoa sa mia kinalavarae koa rini.
 
11 Ele avoso pilipulea rau zama nia Tamasa si hie,
sapu sa ṉiniraṉira si Tanisa tugo,
12 meke Tamugoi Baṉara tugo sa tataru nabuna, gua.* Zob 34:11; Zer 17:10; Mt 16:27; Rom 2:6; Rev 2:23
Meke Agoi tugo telemu piai sari hopeke tie koa gua koari hopeke dia tinavete.

*62:12 Zob 34:11; Zer 17:10; Mt 16:27; Rom 2:6; Rev 2:23