Buka Vina Made
90
Sam 90 kamo Sam 106
(Keke vinaravara te Mosese sa tie madina te Tamasa)
Sa Tamasa Koa Hola meke sa Tie pu Lopu Koa Hola
1 Kei Baṉara, Agoi si na mami Aqoroana koari na sinage na sage.
2 Totoso lopu ele koa sari na toqere,
babe lopu ele va podakia Goi sa pepeso meke sa kasia popoa,
si Agoi mo sa Tamasa ninae rane ka rane.
3 Ele zama ia Goi sa tie pude pule la vasina koana,
meke tozi nia Goi si asa pude pule la pa pepeso.
4 Sa keke tina vuaheni si guana keke rane mo koa Goi,* 2 Pit 3:8
guana norae mo si arini totoso hola rini,
babe guana keke totoso papakana mo pana boṉi.
5 Lopu sana vagi pani Goi sari na mami tinoa;
guana pinutagita mo sa mami tinoa,
na duduli mo sapu lovuru pana munumunu,
6 toa valeana meke havoro valeana,
ba mate harahara pana veluvelu.
7 Tava mate palae si gami pa Mua binugoro,
meke va tarazuzu gami Goi pa Mua tinaṉaziri.
8 Ele vata dogoro vura ni Goi pa kenumu sari na mami sinea,
meke sari na mami sinea tomedi si va vurai Goi pa kalalasa.
9 Sa mami tinoa si tava papaka pa Mua binugoro,
meke sari na vuaheni mami si tava hola taloa guana keke siniṉo mo.
10 Pada zuapa ṉavulu vuaheni mo sari na mami tinoa,
ba be ṉiṉira si gami, si kamoa vesu ṉavulu,
ba koai na ṉinarezo, na tinasuna si arini,
lopu sana murimuri taloa si gami.
11 Loke tie si boka va nonoga ia sa doduruna sa ṉiniraṉirana sa Mua binugoro,
loke tie boka gilania sa minatagutu sapu padana sa Mua tinaṉaziri.
12 Mu va tumatumaeni gami sapu papakadi gua rina mami tinoa,
pude mami tumatumae pa bulomami.
13 Ve seunae gua kaqu koa hola sa Mua binugoro?
Kei Zihova, Mu tataru ni na va manoti sari na Mua nabulu.
14 Mu va siṉini gami sa Mua tataru nabuna doduru munumunu,
pude mami kera qetuqetu pa doduru mami tinoa.
15 Mu va qetuqetu gami, koari na totoso geledi gua tugo sapu va talotaṉa gami Goi koari na mami vuaheni tasunadi.
16 Mu vata dogoro ni koa gami sari na Mua tinavete ṉiṉiradi,
va dogoro ni koari na tumami vugo na repere sa Mua ṉiniraṉira.
17 Zihova mami Tamasa, Mu manani gami,
Mamu va bokaboka gami koari doduru mami tinavete!