91
Tamasa sa Nada Aqoroana
1 Asa sapu koa aqoro koe Zihova Ululuna Hola,
sapu koa hola pa kinopu tanisa sapu tagoi sari doduru ṉiniraṉira
2 si boka zama guahe koa Sa:
“Agoi si na qua tinokae meke na qua Aqoroana.
Agoi si na qua Tamasa, koa Goi mo si kalavarae si rau,” gua.
3 Kaqu va sare igo Sa koari na sipata tomedi,
meke koari doduru minoho variva mate.
4 Kaqu va aqorigo Sa, guana kurukuru pu va aqori sari na tuna pa kauru tatapuruna,
meke kaqu tava sare si goi pa Nana kinopu;
meke kaqu kopu ni Sa sari Nana vina tatara pude va aqorigo meke va sare igo.
5 Ke lopu kaqu matagutu nia goi sa tinasuna pana boṉi,
meke sa rinapata mu pana rane,
6 babe sari na oza pu raza pana boṉi,
babe sari na kinaleadi variva mate pana rane.
7 Be guana ka keke tina si hoqa mate pa kapamu,
meke ari ka manege puta tina si pa vari likohaemu,
ba lopu kaqu hite tava sigiti si goi.
8 Kaqu dogoroni matamu goi
sa vina kilasadi rina tie kaleadi.
9 Sina va evaṉae nia mua aqoroana goi se Zihova,
meke Asa sapu Ululuna Hola sina mua vasina kokoana si Asa sapu tagoi sari doduru ṉiniraṉira,
10 ke loke tinahuara si kaqu raza koa goi,
meke loke ṉinovaṉovala si kaqu kamo pa mua vetu soti.
11 Kaqu garuni Tamasa sari Nana mateana pude kopu nigo,*Mt 4:6; Lk 4:10
pude va aqorigo vasina la si goi.
12 Kaqu ovuligo rini pa limadia*Mt 4:6; Lk 4:11
pude lopu kaqu hite raza nia sa nenemu pa patu.
13 Kaqu neti goi sari na laione na noki;*Lk 10:19
sari na laione variva matagutudi meke na noki variva mate.
14 Zama sa Tamasa, “Kaqu harupi Rau sarini pu tataru Nau,
meke kaqu va aqori Rau sarini pu gilanau sapu Arau se Zihova.
15 Pana tepa mae sarini, si kaqu olaṉi Rau,
kaqu koa turaṉi Rau si arini pa tinasuna,
kaqu va sarei na va lavati Rau si arini.
16 Kaqu pia ni Rau koarini sa tinoa gelenaena,
meke kaqu harupi Rau si arini.”