94
Tamasa sa Tie Varipitui Koari Doduru Tie
1 Kei Zihova, Agoi sa Tamasa sapu tubehe* Lipua sa tinavete sea sapu tavete atu nia sari na tie.,
Mu vata dogoro vura nia sa Mua binugoro.
2 Agoi sa Tie Varipitui koari doduru tie,
Mu poni koari pu vahesi pule ni gua sapu garodi rini.
3 Kei Zihova, vea seunae gua
si kaqu koa tava lavata sari na tie kaleadi?
4 Vea seunae gua si kaqu vahesi pule ni sari na tie variva mate,
meke vahesi pule ni koari na dia tinavete kaleadi?
5 Kei Zihova, ele ṉovala pani hokari rini sari na Mua tie.
6 Va matei rini sari na naboko, na koburu eapadi,
meke va mate pani tugo rini sari na tie karovodi pu koadi pa mami popoa.
7 Zama si arini, “Lopu dogoro gita e Zihova,
meke sa Tamasa te Zekopi si lopu gilania gua sapu evaṉia gita,” gua.
8 Kei, gamu pu tutaka, mi gilagilana tu ba gamu.
Gamu na tie duvili, panavisa kote tumatumae si gamu?
9 Sa Tamasa pu taveti sari na taliṉada si vegua, lopu avavosae si Asa?
Asa sapu taveti sari na matada si vegua, lopu dodogorae tu?
10 Asa sapu norei sari na butubutu huporodi, si vegua,
lopu kaqu va kilasi tugo Sa sari kasa nada tie kaleadi?
Asa si na Tie Va Tumatumae pa doduru tie; ke vegua, lopu tumatumae si Asa?
11 Gilani e Zihova sari na dia binalabala;* 1 Kor 3:20
gilania Sa sapu loke laedi si arini.
12 Kei Zihova, tamanae tugo sa tie pu nore va toṉotia Goi,
meke sa tie pu va tumatumae nia Goi sa Mua tinarae.
13 Kopu nia Goi si asa koari na rane tinasuna,
osolae ta pomunae sari na tie kaleadi.
14 Ura e Zihova si lopu kaqu muliṉi ni sari Nana tie,
meke lopu kaqu veko pani Sa sarini pu Tanisa.
15 Sa tinoṉoto si kaqu ta dogoro pule koa rina vinaripitui,
meke sari na tie toṉoto si kaqu zuka ia si asa.
16 Esei si turu toka nau koari na tie kaleadi?
Esei si turu turaṉau pude varipera koari na tie pu tavetavete va sea?
17 Be lopu toka nau e Zihova si rau,
si be lopu sana ele mate tu si rau.
18 Totoso zama si rau, “Hoqa nau,” gua,
si ovulu sage nau Goi Zihova si rau koasa Mua tataru nabuna.
19 Totoso ta duaṉa na talotaṉa si rau,
si va manotau na va qetu au Goi.
20 Lopu boka somanae koa Goi sari na tie varipitui kaleadi,
sapu va evaṉae nia guana hinokara sa vinilasa seana.
21 Sapu vari aria ni pude razai sari na tie toṉotodi,
meke zutui pude va matei sari na tie viadi.
22 Ba e Zihova si varipera poni au;
meke sa qua Tamasa sina qua Patu vasina va aqorau Sa.
23 Kaqu va kilasa i Sa si arini koari na dia kinaleadi,
meke va mate pani koari na dia sinea.
E Zihova sa nada Tamasa si kaqu va mate pani si arini.