95
Keke Kinera Vinahesi
1 Mae mada kera vahesia se Zihova!
Mada velavela vahesia pa qinetuqetu sa Patu hihiu tana nada Hinarupu!
2 Mada nuquru mae pa kenuna Sa pa kinera vinahesi,
mada kera qetuqetu Nia koari na kinera vinahesi.
3 Ura e Zihova sina Tamasa lavata,
Asa si na Baṉara lavata sapu ṉati hiniva ni sari doduru tamasa.
4 Ṉati hiniva nia Sa sa doduruna sa kasia popoa,
podalae koari na vasidi lohidi meke kamo koari na toqere ululudi hola.
5 Ṉati hiniva nia Sa sa kolo lamana sapu ele tavetia Sa;
meke gua tugo sa pepeso sapu ele kuria Sa.
6 Mae todoṉo mada vahesia,
mada kokotuṉu pa kenuna e Zihova sapu tavete gita.
7 Ura Asa sa nada Tamasa,* Hib 3:15, 4:7
gita si na Nana tie pu ta kopue koa Sa,
meke guana Nana rovana sipi pu kopu ni gita Sa.
Mi va avosia kamahire gua sapu zama nia Sa.
8 “Mi lopu va ṉiṉirai sari na bulomia, gua sapu tavetia rina tiatamamia pa Meriba,* Ekd 17:1-7; Nab 20:2-13
sapu va ṉiṉirai rini sari na bulodia totoso koa rini pa qega pa Ma'asa.
9 Podepodekau rini si Arau vasina,
ba ele dogori dia mo gua saripu evaṉi Rau koa rini.
10 Ura ka made ṉavulu vuaheni si lopu qetu ni Rau sari na tinoni sara,
zama si Rau sapu na tie va gugue si arini!
Lopu hiva va tabei rini sari na Qua tinarae!
11 Bugoro si Rau, ke tavetia Rau si keke vina tatara sapu guahe:* Nab 14:20-23; Diut 1:34-36, 12:9-10; Hib 4:3-5
‘Lopu kaqu kamo ia rini sa Qua vasina magomagogosoana.’ ”