112
Sa Qinetuqetu tanisa Tie Leana
1 Mi vahesia se Zihova!
(Aleph) Tamanae tugo sa tie pu pamaṉa nia se Zihova,
(Bet) meke qetu sisigiti pude va tabei sari na tinarae Tanisa!
2 (Gimel) Kaqu tago ṉiniraṉira sari na tuna koasa popoa sapu ponia sa Tamasa koarini,
(Dalet) meke sari na tutina sa tie toṉoto si kaqu koa tamanae.
3 (He) Kaqu koa mamutu sa nana kinoa,
(Vav) meke sa nana tinoṉoto si kaqu koa hola ninae rane ka rane.
4 (Zain) Kaqu ṉedala vura pa hinuporo, sa kalalasa koari na tie toṉoto,
(Het) koarini pu tataruni na tokani na va tukani sari na tie.
5 (Tet) Kaqu koa valeana tugo sa tie sapu vala poata koarini pu vagi paki poata koasa,
(Yod) meke tavete valeana pa doduru tie koasa nana tinavete holuholu.
6 (Kaph) Sa tie leana si lopu kaqu boka tava kilasa;
(Lamed) kaqu ta balabala si asa ninae rane.
7 (Mem) Lopu kaqu matagutu ni sa sari na inavoso kaleadi.
(Nun) Turu va nabu si asa pa bulona pa nana kinalavarae koe Zihova.
8 (Samek) Soto va nabu si asa pa bulona, ke lopu kaqu matagutu,
(Ain) osolae kaqu dogoro sotia sa vina kilasadi ri na nana kana.
(Zade) kaqu koa hola ninae rane sa nana tinoṉoto,
(Qoph) kaqu koa ṉiṉira si asa, meke ta pamaṉae pa tie.
10 (Resh) Sari na tie kaleadi si kaqu dogoria sapu gua asa, meke ta ṉaziri,
(Shin) kaqu garata livodi si arini meke mate palae,
(Tav) sa inokoro tadirini si kaqu murimuri palae.