113
Vinahesina e Zihova pa Nana Lineana
Mi vahesia se Zihova!
 
Kei gamu na nabulu te Zihova,
mi vahesia si Asa.
Mi vahesia sa Pozana e Zihova!
Tamanae sa Pozana e Zihova,
podalae kamahire meke kamoa na kamoa.
Mani tavahesi se Zihova, podalae pa gasa rimata, meke kamoa pa lodu rimata;
mani tava lavata sa Pozana e Zihova!
Koa baṉara ni e Zihova sari doduru butubutu,
meke sa vina lavatana Sa si hola ni sari na maṉauru!
 
Loketoṉa pule keke sapu gugua e Zihova sa nada Tamasa!
Koa Baṉara si Asa panaulu pa maṉauru.
Doṉo gore si Asa
meke dogoria Sa sa maṉauru meke sa pepeso.
Va rizu sage i Sa sari na tie malaṉa pu koa pa eba na kavuru pepeso;
ovuli Sa sari na habahuala pa dia minalaṉa,
pude somana koari na koburu tavia,
koari na koimata tadi na tie.
Va lavatia Sa sa barikaleqe tigena pa nana vetu,
va qetua Sa si asa, sina va bokaia Sa pude ari Nana koburu.
 
Mi vahesia se Zihova!