114
Keke Kinera pa Totoso Pasova* Ekd 12:51
Totoso taluarae pa Izipi sari na tie Izireli,
sari na tutina e Zekopi koasa popoa tadi na votiki tie,
si ta evaṉae na tie madidi tanisa Baṉara sa butubutu Ziuda,
meke ta evaṉae na Binaṉara te Tamasa sari na butubutu Izireli hire.
 
Dogoria sa Kolo Ziṉara sa minae te Zihova, ke ta paqaha rua nana,* Ekd 14:21; Zos 3:16
meke sa Ovuku Zodani si noso paki sa totolona sa.
Kapikapidolo guana qoti sari na toqere pa minataqara,
meke sari na toa si horuhoru guana tuna sipi.
Na sa si ta evaṉa ke ta paqaha rua tu si agoi na Kolo Ziṉara?
Meke na vegua ke noso tu totolomu si agoi na Ovuku Zodani?
Gamu na toqere, na vegua ke kapikapidolo guana qoti si gamu?
Meke na vegua ke horuhoru guana tuna sipi tu si gamu na toa?
 
Mamu tarazuzu si agoi na kasia popoa pana mae se Zihova,
meke pa kenuna sa Tamasa te Zekopi,
sapu vata evaṉae nia kopi kolo sa patu;* Ekd 17:1-7; Nab 20:2-13
meke koasa patu hihiu si va vura nia bukaha kolo ibu Sa.

*^ Ekd 12:51

*114:3 Ekd 14:21; Zos 3:16

*114:8 Ekd 17:1-7; Nab 20:2-13