119
(Aleph)* Hopeke pukuna sa Sam 119 si podalae koa keke leta pa “A Ba Da” pa Vinekala Hiburu. Sa Tinarae Te Zihova
1 Tamanae tugo si arini pu lopu hite ta zutu pa dia tinoa,
meke luli i sari na tinarae te Zihova.
2 Tamanae tugo sarini pu kopu ni sari Nana vina totolie,
meke va tabea si Asa pa doduru bulodia;
3 sapu lopu tavete va sea,
ba lulia rini sa hiniva te Tamasa.
4 Zihova, ele ponini gami Goi sari na Mua vina tumatumae,
meke ele tozi ni Goi pude va tabe valeani.
5 Okoro nia rau
sapu kaqu kopu valeana ni rau sari na Mua ginarunu!
6 Be kopu totoko ni rau sari na Mua tinarae
si lopu kaqu tava kurekure si rau.
7 Pana va nonoga i rau sari na mua vinilasa toṉotodi,
si kaqu vahesi Igo rau pa bulo viana.
8 Kaqu va tabei rau sari na Mua ginarunu,
ke Mu lopu luara pani au!
(Bet) Vina Tabena sa Tinarae te Zihova
9 Vegua meke kote boka koa via pa nana tinoa si keke tie vaqura?
Pa kinopudi mo sari na Mua zinama.
10 Pa doduru buloqu si hata Igo rau si Goi,
ke Mu kopu nau pude lopu luara pani rau sari na Mua tinarae.
11 Ele va nonogai na kopu ni rau pa buloqu sari na Mua zinama,
pude qu lopu tavete va sea atu koa Goi si rau.
12 Kei Zihova, vahesigo rau si Goi,
Mu va tumatumae nau sari na Mua ginarunu.
13 Kaqu tozi vura ni rau
sari doduru Mua tinarae pu tozi nau Goi.
14 Qetu nia rau si pude va tabei sari na Mua vina totolie,
hola nia si pude soku qua likakalae.
15 Balabala va lohi i rau sari na Mua vina tumatumae,
meke kaqu kopu totoko ni rau sari na Mua hiniva.
16 Kaqu qetu ni rau sari na Mua ginarunu,
meke lopu kaqu muliṉi ni rau sari na Mua zinama.
(Gimel) Qinetuqetuna sa Tinarae Te Zihova
17 Mamu va leana au si rau na Mua nabulu,
pude qu toa si rau meke va tabei sari na Mua zinama.
18 Mu toka nau pude doṉo gilani na tumae ni
sari na hinokara tolavaedi koari na Mua tinarae.
19 Lopu koa seunae si rau pa kasia popoa hie,
Mu va bakali koa rau sari na Mua tinarae.
20 Okoro sigiti nia rau pa buloqu
pude tumae ni sari na Mua tinarae doduru totoso.
21 Norei Goi saripu vahesi pule ni,
madi ta levei gedi sarini pu sekei sari na Mua tinarae.
22 Mu lopu va malumi si arini pude zama ṉoṉovala au na va sisire nau,
sina ele kopu ni rau sari na Mua vina totolie.
23 Be kuhana nau rina koimata si rau,
ba arau sa Mua nabulu si kaqu balabala va lohi i sari na Mua ginarunu.
24 Sari na Mua vina tumatumae si na qua qinetuqetu;
arini si totoli nau.
(Dalet) Inokoro Nabuna pude Va Tabea sa Tinarae te Zihova
25 Namu ele tata pa minate si rau,
Mu va toa pule au gua sapu ele va tatara nia Goi!
26 Sipu tozi helahelae ni rau gua saripu evaṉi rau, si olaṉau Goi;
Mu va tumatumae nau sari na Mua tinarae!
27 Toka nau pude tumae ni sari na Mua tinarae,
meke kaqu balabala va lohi la i rau sari na Mua vina tumatumae tolavaedi.
28 Lodu mate si rau pa tinalotaṉa,
Mu va ṉiṉira au, gua sapu ele va tatara nia Goi!
29 Mu va leseve au koari na hahanana sekesekeidi,
Mamu va tumatumae nau sa Mua tinarae.
30 Ele vizatia rau si pude koa na tie ta ronuequ,
meke ele va avosi rau sari na Mua vinilasa.
31 Kei Zihova, ele luli i rau sari na Mua vina totolie,
ke Mu lopu va malumi sari na tie pude va kurekure au.
32 Kaqu va tabe qetuqetu ni rau sari na Mua tinarae,
sina kaqu va noma ia Goi sa qua ginalagilanadi rini.
(He) Tinepatepana sa Ginilagilana
33 Kei Zihova, Mu va tumatumae nau sari na ginuadi rina Mua ginarunu,
meke kaqu va tabei rau si arini doduru totoso.
34 Mu va bakalia koa rau sa Mua tinarae meke kaqu va tabea rau si asa;
kaqu kopu nia rau si asa pa doduru buloqu.
35 Mu kopu nau pude va tabei sari na Mua tinarae,
sina koarini si vagia rau sa qinetuqetu.
36 Mu va okorau pude va tabei sari na Mua vina totolie,
ba lopu pude koa tagotago.
37 Kopu nau pude qu lopu va sotoa sa qua binalabala koari na tiṉitoṉa pu lokelaedi;
Mu valeana au, gua sapu ele zama nia Goi.
38 Mu kopu nia sa Mua vina tatara koa rau sa Mua nabulu,
gua sapu ele va tatara nia Goi koarini pu va tabe Igo.
39 Mu harupau koari na zinama ṉoṉovala pu matagutu ni rau,
nake tolavaedi sari na Mua vinilasa.
40 Okoro va tabei rau sari na Mua vina tumatumae;
Mu poni nau sa tinoa vaqura, ura na toṉoto si Goi.
(Vav) Kinalavarae koasa Tinarae te Zihova
41 Kei Zihova, Mu tataru nau pa Mua tataru nabuna,
Mu va sare au koari na qua kana gua sapu ele va tatara nia Goi.
42 Pude qu boka olaṉi rau sarini pu zama ṉoṉovalau,
sina kalavarae si rau koari na Mua Zinama.
43 Va boka au pude tozi vura nia sa hinokara doduru totoso,
sina raṉei rau sari na Mua vinilasa.
44 Kaqu va tabei rau sari na Mua tinarae
ninae rane ka rane,
45 meke kaqu koa ta rupaha si rau,
sina podekia rau pude va tabei sari na Mua vina tumatumae.
46 Kaqu tozi vura ni rau sari na Mua vina totolie koari na baṉara,
meke lopu kaqu tava kurekure si rau.
47 Na vagi nia qinetuqetu rau sa vina tabedi rina Mua tinarae,
sina tataru ni rau si arini.
48 Pamaṉa ni na tataru ni rau sari na Mua tinarae,
kaqu balabala va lohi la i rau sari na Mua ginarunu.
(Zain) Rinaṉena sa Tinarae te Zihova
49 Mu lopu muliṉi nia sa Mua vina tatara koa rau sa Mua nabulu,
ura raṉego rau pude poni nau gua sapu va tatara nia Goi.
50 Sa Mua vina tatara asa si va manotau pa qua totoso tasuna,
sina ele va tatara nau Goi sa tinoa.
51 Saripu vahesi pule ni si pesipesi au doduru totoso,
ba arau si lopu hite luaria sa Mua tinarae.
52 Kei Zihova, sipu balabala i rau sari na Mua vinilasa pukeranedi,
si koa manoto si rau.
53 Ta ṉaziri hola ni rau sari na tie huporo
pu sekei sari na Mua tinarae.
54 Pa qua tinoa papakana pa pepeso
si kerakera ni rau sari na Mua ginarunu.
55 Pana boṉi si balabala Igo rau Zihova,
meke hoke balabala i tugo rau sari na Mua tinarae.
56 Vagi nia qinetuqetu rau
sa vinatabedi rina Mua vina tumatumae.
(Het) Vala Pule nia koasa Tinarae te Zihova
57 Zihova, Agoi mo si okoro nigo rau pa doduruna sa qua tinoa;
va tatara nia rau si pude va tabei sari na Mua zinama.
58 Pa doduruna sa buloqu si hata ia rau sa Mua tinamanae,
gua sapu ele va tatara nia Goi.
59 Sipu balabala i rau sari na qua hahanana na tinavete,
kekere la si rau pude kaqu luli i sari na Mua vina totolie.
60 Lopu aqa si rau,
ba va tabe i mo rau sari na Mua tinarae.
61 Sekesekei nau rina tie kaleadi si rau pude tavete va sea,
ba lopu muliṉi ni rau sari na Mua tinarae.
62 Pana korapa boni si vaṉunu si rau meke vahesigo,
sina toṉoto sari na Mua tinarae.
63 Arau si na dia baere arini pu pamaṉa nigo,
meke luli i sari na Mua vina tumatumae.
64 Kei Zihova, sa kasia popoa si siṉia na Mua tataru nabuna,
Mu va tumatumae nau sari na Mua ginarunu.
(Tet) Sa Laena sa Tinarae te Zihova
65 Kei Zihova, ele kopu nia Goi sa Mua vina tatara,
meke ele tavete va leana si Goi koa rau sa Mua nabulu.
66 Mu poni nau sa vinilavilasa va toṉoto meke sa tinumatumae.
Ura va hinokari rau sari na Mua tinarae.
67 Sipu lopu ele va kilasa au Goi si hoke ene sea si rau,
ba kamahire si va tabe i rau sari na Mua zinama.
68 Tavete valeana, meke tataru na vatukana si Goi,
Mu va tumatumae nau sari na Mua ginarunu.
69 Saripu vahesi pule ni si totozi va hakehakei nau si rau,
ba pa doduruna sa buloqu si va tabe i rau sari na Mua vina tumatumae.
70 Sari kasa tie sara si loke dia ginilagilana;
ba arau si qetuqetu ni sari na Mua tinarae.
71 Leana koa rau sa vina kilasaqu,
sina gua asa meke boka va nonoga i rau sari na Mua ginarunu.
72 Leana hola koa rau sari na Mua tinarae,
hola ni sari na tina qolo na siliva.
(Yod) Sa Tinoṉotona sa Tinarae te Zihova
73 Agoi tavete au si rau, meke kopu nau Goi;
Mu va tumatumae au pude qu tumae ni sari na Mua tinarae.
74 Sarini pu pamaṉa Nigo si kaqu qetu pana dogorau ri,
sina kalavarae si rau koari na Mua zinama.
75 Kei Zihova, gilania rau sapu toṉoto sari na Mua vinilavilasa.
Meke ta ronuena sa Mua vina kilasa koa rau.
76 Maqu koa manoto si rau koasa Mua tataru nabuna,
gua sapu ele va tatara nia Goi koa rau sa Mua nabulu.
77 Mu tataru nau na taleoso nau, meke kaqu toa si rau,
sina qetu ni rau sari na Mua tinarae.
78 Saripu vahesi pule ni si madi koa kurekure ni sari na dia zinutu kokoha koa rau;
ba arau si kaqu balabala va lohi la i rau sari na Mua vina tumatumae.
79 Sarini pu pamaṉa Nigo si madi mae koa rau,
pude madi gilani sari na Mua vina totolie.
80 Maqu va tabe valeana i sari na Mua ginarunu,
pude qu lopu tava kurekure si rau!
(Kaph) Tinepana sa Vinasare
81 Kei Zihova ele mabo sa qua tinoa pa inaqamu Goi pude harupau;
ba raṉea rau sa Mua zinama.
82 Ele mabo sari na mataqu na hakehakei Nigo rau koasa Mua vina tatara;
nanasa guahe si rau, “Panavisa kaqu va manoto au e Zihova,” gua si rau.
83 Ele loke laequ mo si rau, gua tugo na ututuvuana kolo lulurana,
ba lopu hite muliṉi ni rau sari na Mua ginarunu.
84 Ve seunae gua si kaqu aqa si rau?
Panavisa kaqu va kilasi Goi saripu ṉoṉovalau?
85 Sari na tie vahesi puleni pu sekei sari na Mua tinarae si sekesekei nau,
pude va hoqa au, gua.
86 Sari na Mua tinarae si ta ronuedi;
sari na tie kaleadi si ṉoṉovala au pa kinohakoha, ke Mamu toka nau!
87 Tata hokara va mate au rini si rau,
ba soto va nabu si rau koari na Mua vina tumatumae.
88 Koa sa Mua tataru nabuna si Mu va sare au pa qua tinoa,
pude maqu va tabei sari na Mua vina totolie.
(Lamed) Rinaṉena sa Tinarae te Zihova
89 Kei Zihova sa Mua zinama si koa hola ninae rane;
koa hola si asa pa maṉauru.
90 Kopu ni Goi sari na Mua zinama koari doduru sinage na sage,
ele sokirae nia Goi sa pepeso meke koa hola si asa.
91 Sari doduru tiṉitoṉa si koa hola kamoa pa rane ṉinoroi,
sina koa gua koasa Mua zinama, meke sina na Mua nabulu sari doduru.
92 Be guana lopu sa Mua tinarae si na ṉatina sa qua qinetuqetu,
si ele mate tu si rau koari na qua tinasigiti.
93 Lopu kaqu hite muliṉi ni rau sari na Mua vina tumatumae,
ura koarini mo si poni nau Goi sa tinoa.
94 Tamugoi mo si rau, ke Mu harupau!
Ura podekia rau pude kopu ni sari na Mua vina tumatumae.
95 Sari na tie kaleadi si korapa opo aqa nau pude va mate au,
ba arau si korapa balabala va lohi la i rau sari na Mua vina totolie.
96 Ele gilania rau sapu sari doduru tiṉitoṉa si koa dia kokoidi,
ba sa Mua tinarae si gotogoto puta.
(Mem) Tataru nia Rau sa Tinarae te Zihova
97 Kei, tataru hola nia rau sa Mua tinarae!
Balabala va lohi la ia rau si asa doduru totoso.
98 Sa Mua tinarae si koa koa rau doduru totoso,
meke toka nau sa pude tumatumae hola ni sari na qua kana.
99 Gilagilana hola ni rau sari doduru qua tie va tumatumae,
sina balabala va lohi la i rau sari na Mua vina tumatumae.
100 Tumatumae hola ni rau sari na tie koadi,
sina va tabei rau sari na Mua tinarae.
101 Va talevara ni rau sari doduru hahanana kaleadi,
pude maqu boka kopu ni sari na Mua zinama.
102 Lopu hite kilu i rau sari na Mua tinarae.
Ura na Agoi mo telemu sa qua tie va tumatumae.
103 Avoso lea koa rau sari na Mua zinama,
lomoso hola nia sa sa namu zipale.
104 Vagi ni tinumatumae rau sari na Mua tinarae,
gua asa ke hakohako ni rau sari doduru hahanana seadi.
(Nun) Kalalasa koasa Tinarae te Zihova
105 Sa Mua zinama si na zuke pa nenequ,
meke na kalalasa pa qua siraṉa.
106 Ele tokotokoro nia rau sa qua vina tatara,
pude va tabe i sari na Mua tinarae toṉotodi.
107 Kei Zihova, ta sigiti hola si rau,
Mu va sare au pa minate, gua sapu ele va tatara nia Goi.
108 Mu va egoa sa qua vinahesi pu poni Igo rau, kei Zihova,
Mamu va tumatumae nau sari na Mua tinarae.
109 Vala ia rau pa tinasuna sa qua tinoa doduru totoso,
ba lopu muliṉi nia rau sa Mua tinarae.
110 Sekesekei nau rina tie kaleadi pude va mate au, gua;
ba lopu hite sekei rau sari na Mua vina tumatumae.
111 Sari na Mua vina totolie si na qua vinagi ninae rane ka rane,
arini tugo si na qua qinetuqetu pa buloqu.
112 Ele vizatia rau si pude va tabei sari na Mua ginarunu osolae beto sa qua tinoa.
(Samek) Koa Valeana pa Kinopudi rina Tinarae te Zihova
113 Kukiti ni rau sarini pu ruarabeke pa dia sinoto koa Goi,
ba tataru nia rau sa Mua tinarae.
114 Agoi si na qua tinokae meke na qua lave.
Raṉei rau sari na Mua zinama.
115 Mi taloa koa rau gamu doduru pu tavete va kaleana.
Arau si kaqu va tabe i sari na tinarae tanisa qua Tamasa.
116 Mu poni nau sa ṉiniraṉira, gua sapu ele va tatara nia Goi, pude maqu toa;
Mu lopu va kurekure au pa qua rinaṉeraṉe!
117 Mu tuqe au, pude maqu koa tava sare,
pude maqu koa va avosi sari na Mua ginarunu doduru totoso.
118 Kilu pani Goi sari doduru pu sekei sari na Mua vina totolie;
sari na dia tinavete sekesekeidi si loke laedi.
119 Tavete guni na remoremo Goi sari na tie kaleadi,
gua asa ke tataru ni rau sari na Mua vina totolie.
120 Matagutu Nigo rau si Goi;
matagutu sisigiti si rau, sina koa gua koari na Mua vinaripitui.
(Ain) Vina Tabena sa Tinarae te Zihova
121 Ele evaṉia rau gua sapu toṉoto meke leana,
Mu lopu luara vala au koarini pu ṉoṉovalau.
122 Mu va tatara nau sapu kaqu toka nau Goi si rau sa Mua nabulu;
Mu lopu va malumi sari na tie huporo pude ṉoṉovalau.
123 Mabo sari na mataqu na hakehakei nia sa Mua tinaharupu,
meke sa vina gorevurana sa Mua vina tatara toṉotona.
124 Mu toka nau, arau sa Mua nabulu koasa Mua tataru nabuna,
Mu va tumatumae nau sari na Mua ginarunu.
125 Arau si na Mua nabulu, Mu poni nau sa ginilagilana,
pude maqu tumani sari na Mua vina totolie.
126 Kei Zihova, hie sa Mua totoso pude va kilakilasa,
sina korapa sekea rina tie sa Mua tinarae.
127 Tataru ni rau sari na Mua tinarae hola nia sa qolo,
meke sa qolo sapu ele tava viana.
128 Gua asa ke luli i rau sari doduru Mua vina tumatumae.
Hakohako ni rau sari doduru hahanana seadi.
(Pe) Inokoro pude Va Tabea sa Tinarae te Zihova
129 Marilaedi hola sari na Mua vina totolie,
gua asa ke kopu ni rau si arini.
130 Sa vina bakaladi rina Mua vina tumatumae si va mae ia sa kalalasa.
Meke ponia sa sa ginilagilana koari pu pupuhu.
131 Popa leo si rau,
ura memeha ni rau sari na Mua tinarae.
132 Mu mae koa rau, Mamu tataru nau, Mamu taleoso nau,
gua sapu tavete ni Goi saripu tataru nia sa Pozamu.
133 Kopu nau pude maqu lopu hoqa pa sinekedi sari na Mua tinarae,
Mu lopu va malumau pude tava kilasa koa sa kinaleana.
134 Mu va sare au koari pu ṉoṉovalau,
pude maqu va tabei sari na Mua tinarae.
135 Mu mana nau pa Mua sinomana koa rau,
Mamu va tumatumae nau sari na Mua vina totolie.
136 Guana titisi sari na kolomataqu,
sina kilui rina tie sari na Mua tinarae.
(Zade) Sa Tinoṉotona sa Tinarae te Zihova
137 Kei Zihova, toṉoto si Goi,
meke sari na Mua tinarae si toṉoto tugo.
138 Sari na Mua vina totolie pu taveti Goi,
si leadi hola pa doduru tie.
139 Sa qua binugoro si maṉini pa buloqu guana nika,
sina kilu i rina qua kana sari na Mua zinama.
140 Hinokara hola sa Mua vina tatara,
meke qetu hola nia rau na Mua nabulu si asa.
141 Lopu arilaequ, meke ta kiluqu si rau,
ba lopu hite muliṉi ni rau sari na Mua tinarae.
142 Sa Mua tinoṉoto si toṉoto ninae rane,
meke sa Mua tinarae si hinokara doduru totoso.
143 Tinasuna na tinalotaṉa si raza koa rau,
ba sari na Mua tinarae si variva qetu koa rau.
144 Sari na Mua vina totolie si toṉoto ninae rane.
Mu poni au sa ginilagilana pude maqu toa si rau.
(Qoph) Sa Tinepa Vinasare koe Zihova
145 Kei Zihova, tepa atu si rau koa Goi pa doduruna sa buloqu!
Mu va tabe au, meke kaqu kopu ni rau sari na Mua ginarunu.
146 Tepa atu si rau, Mu harupau,
meke kaqu va tabei rau sari na Mua vina totolie.
147 Pana vaqavaqasa si vaṉunu si rau, meke tepa atua sa tinokae;
raṉei rau sari na Mua zinama.
148 Peqa nia rau doduru boṉi
hoke balabala va lohi la i rau sari na Mua vina tatara.
149 Kei Zihova, sa Mua tataru si nabuna, ke Mu avoso mae au,
Mu kopu nia sa qua tinoa, pa Mua tinoṉoto
150 Korapa nono mae sarini pu ṉoṉovalau,
sarini pu lopu kopukopu ni sari na Mua tinarae.
151 Ba korapa koa tata si Goi koa rau, Kei Zihova,
sari doduru Mua tinarae si hinokara.
152 Pukerane tu si ele va nonoga i rau sari na Mua vina totolie,
meke gilania rau sapu ele va turu i Goi ninae rane.
(Resh) Keke Tinepa Tinokae
153 Mu doṉo mae au koasa qua tinasigiti, Mamu va sare au,
ura na lopu kilu pani rau sari na Mua tinarae.
154 Mu lavelave hukata nau pa qua tinoa, Mamu vata rupahau pa tinasuna,
na harupau gua sapu ele va tatara nia Goi.
155 Sari na tie kaleadi si lopu kaqu ta harupu,
sina lopu kopu ni rini sari na Mua ginarunu.
156 Ba noma hola sa Mua tataru va tukana Goi Zihova,
Mu harupau pa Mua vinilasa toṉotona.
157 Soku hola sari na qua kana pu ṉoṉovala au,
ba lopu hite malohoro si rau pa kinopudi rina Mua tinarae.
158 Etulu pani rau sari kasa tie ṉoṉovala sara,
sina lopu kopu ni rini sari na Mua tinarae.
159 Mu balabala ia sapu gua qetu guni rau sari na Mua vina totolie!
Mu kopu nia sa qua tinoa koasa Mua tataru nabuna.
160 Sari doduru zinama Tamugoi si hinokara,
meke sari doduru mua tinarae toṉotodi si koa hola ninae rane.
(Sin meke Shin) Kinopuna sa Tinarae te Zihova
161 Sari na koimata si ṉoṉovala hoborau rini,
ba pamaṉa nia rau sa Mua zinama.
162 Qetuqetu hola qua tu, sina koa gua koari na Mua vina tatara.
Sa qua qinetuqetu si gua tugo tadi pu vagia si keke tinago leleana.
163 Hakohako hola ni rau sari na kinohakoha,
ba qetu nia rau sa Mua tinarae.
164 Ka zuapa totoso pa keke rane si vahesigo rau,
koari na Mua tinarae toṉotodi.
165 Sarini pu qetu nia sa Mua tinarae si koa va bulebulei;
meke loketoṉa si kaqu boka va hoqai si arini.
166 Kei Zihova, raṉea rau sa Mua tinaharupu,
meke va tabe i rau sari na Mua tinarae.
167 Va tabe i rau sari na Mua vina totolie,
sina qetu ni rau si arini pa doduru buloqu.
168 Va tabe i rau sari na Mua tinarae na vina totolie,
ura gilani Mua Goi sari doduru qua hahanana na tinavete.
(Tav) Keke Tinepa Tinokae
169 Kei Zihova, mani kamo atu koa Goi sa qua tinepa tinokae;
Mu va tumatumae au, gua sapu ele va tatara nia Goi.
170 Mamu va avosia sa qua vinaravara,
gua sapu ele va tatara nia Goi.
171 Kaqu vahesigo rau si Goi doduru totoso,
sina va tumatumae nau Goi sari na Mua ginarunu.
172 Kaqu kera ni rau sari na Mua zinama,
sina toṉoto sari na Mua tinarae.
173 Mu koa va namanama doduru totoso pude toka nau,
ura ele vizatia rau pude luli sari na Mua vina tumatumae.
174 Kei Zihova, hakehakei nia rau sa tinaharupu,
meke qetuqetu nia rau sa Mua tinarae.
175 Mu va toa au, pude maqu vahesi Igo,
madi toka nau rina Mua tinarae si arau.
176 Ene hoboro lamae si rau, guana sipi muliuṉu,
gua asa ke mae, Mamu hata pule nau si arau sa Mua nabulu,
ura na lopu kilu i rau sari na Mua tinarae.