143
Tinepa Tinokae Koe Tamasa
(Keke kinera te Devita)
1 Kei Zihova, Mu avoso mae ia sa qua tinepatepa!
Gua sapu ele tozia Goi pa Mua Zinama,
Mu olaṉau pa Mua tinoṉoto!
2 Mu lopu turaṉau pa vinaripitui si arau na Mua nabulu,*Rom 3:20; Qal 2:16
ura loke tie si toṉoto pa Mua dinoṉo Goi.
3 Ura korapa hadu luli au sa qua kana si arau,
meke va kilasa hokarau sa.
Namu ele va gore hokarau sa si rau pa hinuporo,
gua ri pu ele matedi pukerane tu.
4 Gua asa ke mabubulu sa maqomaqoqu;
namu ele nunala sa maqomaqoqu.
5 Lopu muliṉi ni rau sari na totoso pukerane.
Balabala sisigiti i rau sari doduru gua pu ele evaṉi Goi.
Balabala la i rau sari doduru Mua tinavete.
6 Va sage i rau koa Goi sari na limaqu pa korapa vinaravara.
Ta hivae hola si Goi koa rau.
Kekeṉoṉo gua sa pepeso popana si hiva hola nia sa ruku,
si na memeha Nigo sa maqomaqoqu.
7 Kei Zihova, Mu tuturei olaṉa mae au,
ura ele nunala hola si rau!
Mu lopu va paere pule Nigo koa rau;
be lopu gua si kote mate palae si rau pa popoa tadi na tie matedi.
8 Maqu va avosia pana munumunu sa Mua tataru nabuna,
ura koa Goi mo si kalavarae rau.
Mu va dogoro nau sa siraṉa sapu garo pude la ia rau,
ura koa Goi mo si varavara atu rau pa doduru qua tinoa.
9 Kei Zihova, Mu va sare au koari na qua kana,
ura koa Goi mo si govete atu rau pude aqorae.
10 Mu va tumatumae nau gua pude evaṉia sa Mua hiniva,
ura Agoi mo sa qua Tamasa!
Sa Maqomaqo leana Tamugoi si mani turaṉau pa siraṉa vasina kaqu tava sare nia rau.
11 Koa gua sa guguamu Goi, Kei Zihova, Mu va sare au gua sapu ele va tatara nia Goi.
Pa korapa Mua tinoṉoto si Mu va sare au pa tinasuna.
12 Koasa Mua tataru nabuna koa rau, si Mu va mate pani sari na qua kana;
Mu va mate beto pani sari doduru pu ṉoṉovala au,
ura na Mua nabulu si rau.