5
Sa Koreo
1 Qua babaere, qua lomoso, atu koa goi si rau koasa qua inuma;
sari qua oto huda na lumu humaṉa lea si ele vagi rau.
Meke ele henai rau sari qua namu zipale meke na kolo zipale;
ele napoi rau sari qua vaeni meke meleke.
Sari na Barikaleqe pa Zerusalema
Mi hena, gamu mami baere, mi napo mia;
uve, napo va siṉi nia sa tataru!
Sa Kinera Vina Made
Sa Vineki
2 Puta si arau ba sa buloqu si vaṉunu eko mo.
Avoso la! Sa qua babaere si korapa kikia;
zama si asa, “Loaqu, tukele mae koa rau,
qua kukuva leleamu hola.
Sa batuqu si va boboso ia na puni,
meke sa kaluqu si teteroko koasa rovu,” gua si asa.
3 Ba ele va gore poko si arau;
vea, kaqu va sage pulei tu rau?
Ele ṉuzapi rau sari nenequ;
vea, kaqu va boni pulei tu rau?
4 Sa qua babaere si va nuquru mae ia sa limana koasa sasada;
meke qetu hola si rau ke ta duaṉa buloqu.
5 Gasa turu si rau pude tukele poni ia sa qua babaere,
na lumu humaṉa lea si honi pa limaqu,
pa kakarutu limaqu si zoloro si asa,
totoso tuqea rau sa roto koasa sasada.
6 Tukele ponia rau sa qua babaere,
ba sa qua babaere si ele taloa tu; ele ta luarae nana tu.
Ta lotaṉa sa buloqu sapu taloa si asa!
Doṉo hata ia rau, ba lopu boka dogoria rau.
Titioko si rau, ba lopu olaṉa si asa.
7 Sari tie kopu pana boṉi si dogoro au
sipu korapa ene pa dia tinavete.
Seke au meke va bakora au rini;
vagi pani ia rini sa qua hade batu,
gua asa sari tie kopu pana boṉi.
8 Gamu na tudia vineki ri pa Zerusalema, si tepa gamu rau,
pana dogoria gamu sa qua babaere:
Tozi nia sapu kuliusu nia rau sa binalabalana sa.
Sari Barikaleqe pa Zerusalema
9 Agoi sapu leleamu hola ni sari doduru vineki,
vea meke votikaena sa mua babaere koari doduru pule?
Vea meke votikaena hola ni sa sari doduru,
ke kaqu garunu guni gami tu goi?
Na sa si ari laena nia sa?
Sa Vineki
10 Sa qua babaere si leleana meke toa va leana tinina;
be manege puta tina tie koa ba kote bakala vura nana.
11 Sa isumatana si doṉo lea guana qolo;
sa kaluna si bogusu toa
meke muho guana pitikole.
12 Sari matana si gua rina kukuva pa kali tototolo,
ta huve va keoro pa meleke,
meke tava garo gua rina patu ṉedala.
13 Sari paparana si leleadi guana inuma havoro
sapu va tivusu humaṉa lea.
Sari beruna si guana havoro lili
sapu boboso ia na lumu humaṉa lea.
14 Sari limana si ta tavetedi valeana guana qolo,
meke tava sarie patu buma ṉedaladi.
Sa tinina si memehe guana livo elopaniti
sapu kadakada patu ṉedala.
15 Sari nenena si gua rina dedegere patu mabolo,
na petapetala nenena si na qolo.
Sa kinehana sa si variva dogoro gua ri na toqere pa Lebanoni,
na ululu gua rina huda sida.
16 Sa ṉuzuna si lomoso;
sari doduru ginuana sa si hiva betoni mo arau.
Gamu na barikaleqe pa Zerusalema,
gua asa sa qua babaere.