6
Sari Barikaleqe pa Zerusalema
1 Agoi sapu leleamu hola koari doduru vineki,
pavei la gua sa mua babaere?
Pavei ene la gua sa mua babaere,
pude mami hata toka nigo?
Sa Vineki
2 Sa qua babaere si gore la koasa nana inuma,
vasina toqolo sari na naqarita humaṉa lea
pude ene dogori sari linetelete
meke pudiki vagi havoro lili vasina.
3 Arau si tanisa qua babaere meke sa qua babaere si taqarau;
asa si la dogori sari na havoro lili.
Sa Kinera Vina Lima
Sa Koreo
4 Qua babaere, agoi si leleamu hola, gugua sa popoa baṉara pa Tiriza,
tolavaemu hola, gugua sa vasileana pa Zerusalema,
variva dogoro, gua rina varane meke sari dia pitipiti.
5 Sari matamu si va keve va seu i koa rau;
na va kaleana ia rini qua binalabala.
Sari kalumu si niu gua rina rovana qoti mumuhodi
pu gotolo gore koasa kali toqere pa Qileadi.
6 Sari livomu si keoro guana rovana sipi,
sapu tiqe beto ta huve va via.
Sari kali vivi si koa beto dia;
lopu keke sapu lopu koa.
7 Sari paparamu pa mudi poko paere isumata
si guana kukuru vua pomeqaraneti.
8 Kote koa dia si ka onomo ṉavulu puta kalaho,
meke ka vesu ṉavulu puta barikaleqe nabulu,
meke na vineki vaquradi sapu lopu boka ta nae;
9 ba sa qua kukuva si votikaena hola, loke vasi kisakisana si asa,
sa tuna vineki ekei tanisa tinana,
sa katakikihi tanisa pu podona.
Dogoria rina vineki si asa meke poza nia tamanaena si asa;
sari na kalaho na barikaleqe nabulu ba va lavatia.
10 Esei si hie, sapu malara mae guana munumunu vaqasa,
bulebule guana sidara, ṉedala guana rimata,
meke variva dogoro gua rina tokele pinopino?
11 Gore la si arau koasa qua hudahuda okete,
pude dogoria sa tinoqolo vaqura koasa lolomo,
be ele liho sa vaeni,
babe ele havoro sa pomeqaraneti.
12 Sipu korapa gua si rau, si turaṉau sa qua hiniva roro,
meke veko au gua rina totopili varipera sapu bebeno la pa vinaripera.*Sa vesi hie si lopu bakala pa zinama Hiburu.
Sari Barikaleqe pa Zerusalema
13 Pule mae, pule mae, agoi na vineki pa Sulami;
pule mae, pude maqu dogoro igo.
Sa Koreo
Na vea ke hiva doṉo toto ia gamu sa vineki pa Sulami,
kekeṉoṉo gugua sa totoso pekapeka sari na vineki pa kenudi rina qeto minate varipera?