7
Sa Koreo
Tolavaena hola sari na nenemu koari na sadolo,
agoi na tuna vineki sa baṉara!
Sari pudapuda labedi tamugoi si gua rina patu ṉedala,
guana tinavete tadi na tie matazoṉa.
Sa dokemu pa tiamu si ta tavetena va leana,
guana kapa sapu siṉia na vaeni ta henina.
Pa hubi tiamu si guana botu bereti
sapu vari kali nia na havoro lili.
Sari karua susumu si guari na karua tuna dia,
na karua vivi tanisa kurukuru qazele.
Sa ruamu si guana vetu ululu keorona sapu ta tavetena pa livo elopaniti.
Sari matamu si gua rina kopi pa Hesiboni,
pa kali sasadana sa goba pa Bati Rabimi.
Sa isumu si guana vetu ululu pa Lebanoni,
vasina koa sari tie kopu meke tiro karovo la pa Damasikasi.
Sa batumu si na mua toropae baṉara,
ululu gugua sa toqere Kameli.
Sari kalu gele tamugoi si muho meke ṉedala;
na baṉara ba boka saputu vagia sa.
Kei! Nake bulebule meke leleamu hola si agoi!
Agoi qua tataru, agoi poni nau qinetuqetu si arau!
Sa tinimu si guana huda manioko,
meke sari susumu si guana karua vua manioko.
Zama si rau, “Maqu haele ia sa manioko;
maqu taṉini vagi sari na vuana.”
Sari susumu si madi gua rina katakata qurepi.
Sa siniṉo tamugoi si humaṉa lea guana apolo,
meke sa ṉuzumu si guana vaeni ta tavete va leanana.
Sa Vineki
Mani totolo la sa vaeni koasa qua babaere,
gotolo hola ni sa sari beruna na livona.
10 Arau si tanisa qua babaere,
meke sa nana hiniva si arau mo.
11 Mae, qua babaere, mada la pa kali popoa,
mada la va hola boṉi koari na vasileana hitekedi.
12 Mada topue vaqavaqasa la koasa inuma vaeni
pude mada dogoria be ele liho sari na vaeni,
babe ele pelara sari havorodi,
meke be ele havoro sa pomeqaraneti.
Vasina kote vatu nia rau sa qua tataru koa goi.
13 Sari karoso madariki* Sa karoso madariki si va ṉiṉira ia sa binalabala tanisa barikaleqe, pude va gavoro koburu. Mi tiro la pa Zen 30:14. si tivusu humaṉa lea,
meke sari vuvua lomosodi si pa nada sasada,
sari vua vaquradi meke vua koadi,
sapu va naqiti ponigo rau si agoi, qua babaere.

*7:13 Sa karoso madariki si va ṉiṉira ia sa binalabala tanisa barikaleqe, pude va gavoro koburu. Mi tiro la pa Zen 30:14.