8
Sa Vineki
1 Kei! Be na tasiqu koreo mo si agoi,
sapu susu koasa tinaqu!
Si, be dogorigo rau pa sada,
si kote atu ṉaza igo rau,
meke loke tie kote zamani gita.
2 Kote turaṉa igo rau,
meke la pa vetu tanisa tinaqu,
asa pu va tumatumae au.
Kote ponigo vaeni rau, sapu tava lomosona, pude napoa;
napoa sa kolo lomoso tadi na qua pomeqaraneti.
3 Sa kali lima gedena si pa kauru batuqu,
meke sa lima mataona si va ṉaza nau sa.
4 Gamu na tudia vineki ri pa Zerusalema, si tepa gamu rau:
Mi zama tokotokoro
pude lopu okoro nia sa puta turaṉa koreo osolae kamo atu sa mia totoso varihaba.* Mi tiroa sa vina bakala pa vesi 2:7 pa hubina elo pepa.
Sa Kinera Vina Onomo
Sari Barikaleqe pa Zerusalema
5 Esei si mae gua pa qega sana,
sapu kalavarae la koasa nana babaere?
Sa Vineki
Va vaṉunu igo rau pa kauruna sa huda apolo;
vasina pu podo igo sa tinamu,
pa tinasigiti nomana meke podo igo sa.
6 Mu kuberia pozaqu koasa bulomu,
guana vinagilagila pa limamu sapu tamugoi si rau;
ura sa tataru si ṉiṉira hola guana minate,
meke sa kono tanisa si nabu guana lovu.
Boka sulu guana nika huruṉuna,
guana keke nika lavata.
7 Na kolo lopu kote boka va matea sa tataru;
sari na ovuku lopu kote boka kuzu ia.
Be keke tie hiva holua sa tataru,
pa doduruna sa tinagotago pa nana vetu
ba kote ta kilu mo sa nana tinepa.
Sari Tasina Koreo sa Vineki
8 Gita si koa nana si keke tasida vineki mudina,
meke sari susuna si tiqe totu mo.
Na sa kote tavete ponia gita sa tasida vineki
pana mae tepa ia rini pude varihaba?
9 Be guana na gobagoba si asa,
si na vetu hakehakei ululuna, sapu tale tava sarie siliva, si kote tavete ponia gita pude va leleania.
Ba be na sasada si asa,
si kote bara nia gita koari na huda sida pude kopu totoko nia.
Sa Vineki
10 Arau si na gobagoba,
meke sari susuqu si gua rina vetu hakehakei.
Gua asa ke pa matana sa qua babaere
si paleke mae inavoso leana si arau koasa.
11 E Solomone si koa nana keke nana inuma vaeni pa Beolo Hamoni,
sapu va kopu nia tie sa pude va vura nia poata.
Hopeke tie si kote tabaria keke tina poata siliva,
koari na laedi rina vuvua koasa vaeni.
12 Ba sa qua inuma vaeni si qua telequ, qua pude lalae eke nia;
kei Solomone, tamugoi sari keke tina poata siliva,
meke karua gogoto si tadi na tie kopu inuma.
Sa Koreo
13 Agoi pu koa koari na inuma,
turaṉae koari na mua baere pu kopu nigo,
oqu avoso hola ia sa mamalaiṉimu.
Sa Vineki
14 Aria, mae, qua babaere,
mu haqala mae guana kurukuru qazele,
babe na kurukuru dia vaqurana
koari na toqetoqere koa i na havoro humaṉa lea.