4
Juan gwage nga ngaña gitidi Chube kle toi ngwadi,
ne ngwadi ulita kle gerule no Chube giti
1 Cha chada degu ene ulita Jesucristo gerudu cha ole kare gire cha gwagedu ngaña bdugu nga ngaña giti, cha gwagedu ugaka degabangadi nga ngaña giti joge Chube kle ngwadi. Cha geru keruchugaba gerule cha ole nga ngaña giti ngeru gdade kweri trompeta kare, amaña gerudu cha ole nakwaite: “Bai aini nga ngaña giti, lle ulita be boi aige gwangerugu ulita cha be kaite bage.” 2 Cha geru keruchugu gerule ene cha ole gire blikare cha chegu Chube Oña kirallaske, cha sugedu moge Chube Oña cha du nga ngaña giti, gire cha gwagedu nga ngaña giti toigda dba no nodi kledu gbaba, toigda e giti cha gwagedu kwiandi gdaite kledu toiba dba. 3 Kwian cha gwagedudi toiba dba ama chegu cha gwage gwadenga noare salengwli kechuga gwadenga no ñanaske ka jwankle jaspe kare kaire salengwli kechuga dabere no ñanaske ka jwankle cornalina kle gwadenga no kare. Kwian e toigdalla nodi tangle cha gwagedu kebita manedi chratigenga no trate kechuga lerere ka jwankle esmeralda chra gwadenga kare. 4 Kaire kwian e toigdalla nodi tangle cha gwagedu toigda na veinticuatrodi. Toigda ulita e giti cha gwagedu kwian daba Chubenu chugagwalla juma kledu toiba dba ama ulita veinticuatro kledu, kaire ama ulita kledu mo ngama tkaba ñometra jutreske. Ama nu lle orole sombrero kare gwadenga no gbaba mo chugage. 5 Toigda gdaite kwian chugagwalla ma kweri kle toiba dba ngwadi nga kledu ko chrachienga enusulindra kledu gdade tirare. Chugagwalla kweri toigdalla dba ngwadi ngerudba jichra gdaguke kledu chratigenga no, jichra gdaguke e Chube Oña kare. 6 Chugagwalla kweri toigdalla ngerudba cha gwagedu lle nodige ble ngwedige kare, ble e chi oña che kle gwage mo gwadi kare, ene ble. Toigda kweridi tangle kodi lle gwade gdabaga kledu, gdaite toigda kweri ngeru, gdaite toigda nate, gdaite toigda ko jole ngnagu giti, gdaite toigda ko taingwli ngnagu giti, lle gdabaga e gwagwa molen ngle mo ngeru mo nate. 7 Lle gwade gdaite kle ngeru ama chege salengwli gude kweri kare, lle na gdabokedale ama chege chbi ñenua kare, lle na gdamaidale gwa chege kwian kare, lle na gdabagadale chege mu kweria kle jichienga kare. 8 Lle gdabaga e gdaite gdaite kaire kaire ama ulita jiga molen gdadereke kaire ama gwagwa ngle molen jegwale ulita. Ama ulita gdabaganate me kle ka chite ngajrege ngajudige gerule no Chube giti diali:
“Chube no no trate ulita, Chube agenga no diali ulita, Chube kwian ulita Chugagwalla kweri kiraske tanre.
Chube lle ulita Chugagwalla gwangea ngerutabi, kaire Chube amaña lle ulita Chugagwalla nege tangle kaire Chube amaña be chege lle ulita Chugagwalla chui bdaglige diali chui tangle, Chube no trate diali.”
Lle gwade gdabaga diali kledu gerule no ene Chube giti Chube gbe kweri.
9-10 Chube toinga diali chui tangle ama kledu toiba dba toigda kweri giti gire lle gwade gdabaga e kledu gerule no diali Chube giti Chube gbe kweri ama Chugagwalla. Lle gdabaga kledu gerule no diali ene Chube giti gire kwian daba Chubenu chugagwalla juma veinticuatro, ama ulita kledu jongnagwa skute dba Chube gwangnagu Chube gai dage kaire kwian e ulita kledu lle no orole dodaba sombrero kare gbaba mo chugage jwennga, ama kledu lle e gbe ulita Chube gwangnagu, gire ama kledu gerule no Chube ole ene:
11 “Chube, ba cha ulita Chugagwalla, ba no trate kweri, ba giti cha ulita gerule no.
Cha gerule ba giti ba cha Chugagwalla kweri ba kira molen tanre, ba mo ta gbu lle ulita dodade unsuialin tangle, ba lle ulita dodadu no trate, ba giti lle ulita ba dodadu kle gwade kle toi no ulita.”
Kwian daba Chubenu chugagwalla juma veinticuatro kledu gerule no ene Chube ole.