5
Gerudre no kaire mo gatre no Bda Cordero giti
1 Chube kledu toiba dba toigdalla kweri giti, Chube ko taingwli giti cha gwagedu ama kote chada bliabangadi, chada bliabanga e kledu degaba skieru ngnaru kaire giti ngnaru, chada gáge dba kledu jegaba kejre bitaguke tangle lle chada gatagda giti, ene kwian na me ñage chada e trennga chada batenga. 2 Gire kaire agwe cha gwagedu lle boanga Chube alin nga ngaña giti gdaitedi ama lle boanga no kiraske ama gerudu kweri ene: “¿Chema ta no trate ulita ñage lle chada gatagda gdaguke jwennga chada bliabanga trennga gire chada batenga? ¿Chema no trate ñage age ene?” 3 Lle boanga Chube alin kledu gerule ene gire ni kwian gdaite kledu chada treannganga. Ni kwian gdaite nga ngaña giti ni kwian gdaite nga dba giti ni kwian gdaite jogebakeda oña kle nga kada Hadege ñadu chada e trennga ni gwagedi. 4 Cha gwagedu ene ulita gire cha olidu tanre, cha me ñadu mo ta gate oli ole. Cha me gwagedu ni kwian gdaite ta no trate chada kweri treannganga ni batanga, e giti cha olidu tanre. 5-6 Cha ta kledu olire gire kwian daba Chubenu chugagwalla juma veinticuatro ama gdaite gerudu cha ole ene: “Ba me olire dare. Gwage kwian edi kwian na kle ama ka jwen Gude chieba kwian israelita unsuialin kada Judá oindallage, kaire kwian gdaite amaña ama kwian unsuialin tangle chugagwalla David oindalla. Ama kira molen, ama ñage age ulita. Ama ñage lle chada gatagda gdaguke jwennga ulita, ama ñage chada ai trennga, kaire ama ñage chada ai batenga. ¿Mineade ba kle olire? Kwian gdaite e ñage age ulita.” Kwian daba Chubenu chugagwalla juma gdaite gerudu ene cha ole gire cha gwagedu kwiandi gdaite bda cordero kare. Ama lentigeba trate jegwale ama gwabada kare, agwa ama kledu jagebanga gdate tainkwli Chube kledu toiba dba ngwadi ngnagu, kaire lle gwade gdabaga kledu amadi tangle kaire kwian daba Chubenu chugagwalla juma veinticuatro kledu amadi tangle. Kuda gdaguke chieba Bda Cordero e chuga giti kaire ama gwagwa gbaguke molen, gwagwa e ulita salengwli Chube Oña no trate ulita kare, Chube kle mo Oña kage nga dba giti ulita kwian ta gbe Chube giti. Cha gwagedu Bda Corderodi e Jesucristo. 7 Bda Cordero e jo Chube gitigu gire ama chada bliabanga gau Chube ko taingwli giti. 8 Bda Cordero chada e gau kote gire lle gwade gdabaga kaire kwian daba Chubenu chugagwalla juma veinticuatro ama ulita jongnagwa skutu dba Bda Corderodi ama gwangnagu Bda Cordero gai dage. Lle gwade gdabaga kaire kwian daba Chubenu chugagwalla juma veinticuatro ama ulita gdaite gdaite kledu lle gitarale kada arpa ole kote dagalenga. Kaire ama ulita kote lle orole dodabale jogdale kledu, lle jogdale e toli lle kinre ñachke no kada incienso tkaba ngle. Lle ñachke no e chege salengwli geru kwian Chubenu kle gerule no giti Chube ole kare. 9 Kwian mangire batre ulita kledu ne ngwadi ama ulita mo gatu biale geru no jagere giti Bda Cordero alin ene:
“Cha ulita no ba ole.
Ba ulia no trate malen ba ñage chada e gai kote lle chada gatagda gdaguke jwennga.
Ba jo boaba daga ngwale gwabada kwian agedu me no giti.
Ba boidu daga ngwale ba jokeda kruge kwian ulita alin ene kwian ulita ba gai ulia ñage chege Chubenu, ba agedu ene kwian chudalla ulita alin kaire kwian gerunga kwira ulita alin kaire kwian toinga nga ulitage alin.
Ene ba jokeda giti kwian ulita ñage Chube uñe.
10 Ba giti kwian ulita ba gerua ganga chege Chubenu, ba ama ulita Chugagwalla, ba kwian e ulita gbu gerungale Chube ole daba na alin, kaire ba ama gbu kwian lle boangale Chube alin.
Gire ama be chege kwian na ulita chugagwallale ba ole ule nga dba giti.
Ba kweri trate ba ñage age ulita.”
Kwian daba Chubenu chugagwalla juma veinticuatro kaire lle gwade gdabaga ulita mo gatu gerudu no ene Bda Cordero ole.
11 Gire sugetibi allabi cha gwagedu lle boanga Chube alin tanre tanredi lle boanga tanre ma ngle millonge ni cha ñadu ama ulita ten. Lle boanga e ulita kledu mo litaba kwian daba Chubenu chugagwalla juma veinticuatrodi tangle kaire lle gwade gdabagadi tangle kaire toigda kweri gdaitedi tangle ama ulitadi tangle lle boanga tanre tanre kledu. 12 Cha lle boanga ulita keruchugu gerule no kweri kiraske Bda Cordero giti:
“Bda Cordero jo gwabada kwian agedu me no giti, cha gerule no ama giti cha no no ama ole.
Ama kiraske tanre ulita, ama ñage age ulita, ama ma kiraske lle ulitage, ama lle ulita mauñale, lle ulita amanu, kaire amage kle chke uñale lle ulita giti.
Ama no trate ulita malen cha ama gai dage, cha ama gai mo Chugagwallale no, cha gerule no no ama giti.”
Lle boanga Chube alin tanre ulita gerudu no ene Bda Cordero giti.
13 Kaire lle ulita Chube nu dodaba cha ama keruchugu gerule, lle ulita kle nga ngaña giti kaire lle ulita kle nga dba giti kaire kwian ulita oña kle nga kada Hadege kaire lle ulita kle bleske, lle ai ulita Chube nu dodaba kledu gerule no ene:
“Kwian kle toiba toigda kweri no gdaite giti kaire Bda Cordero kle ama ngena, ama gdabonate giti cha gerule no no diali.
Cha no no ama ole, cha ama gai dage, ama kira molen ulita, ama no trate ulita diali.
Ama gdaboke chege kweri kiraske lle ulita Chugagwalla chui tangle diali.”
Lle ulita Chube nu dodaba kledu gerule no ene Chube giti kaire Bda Cordero giti, 14 gire lle gwade gdabaga gerudu ene:
“Cha takalin ulita chege lle ulita kle gerule kare Chube giti kaire Bda Cordero giti. Ene nobi.”
Lle gwade gdabaga gerudu ene gire kwian daba Chubenu chugagwalla juma veinticuatro ulita jongnagwa skutu dba Chube kaire Bda Cordero gai dage mo Chugagwallale kweri.