Saafi-Saafi Macce 1

Yegɗohiŋ Muci Macce fiis

Rangsohaani

Macce ɓaah ŋ Apootar ciŋ Yeesu. A namee teeku "Lewi". A nikee juuti'oh wuu ɓi Rom wa Yeesu ɓeeɗuk ɗe.✡ Fu jang teerndi ɗah, fu na hote ne a fiis wuu Yawuut ci. A kooɗiɗ woo laayiɗ ŋ Fiis ciŋ Ambtiɗohi Koc.

Macce, wi a na fiise teerndii, a camb na limiŋ tiik ciŋ caac ciŋ Yeesu. A naandsukka findi Yeesu rimohu na in ci a haɓiɗ ŋ kehƴi, na in ci a jangɗoh, na kakaan kiŋ ɗe na hultiŋ ɗe. Yeesu yegɗeen ɓooɓa woo kiŋ Kooh, a wirɗeeɗa kosaayiɗ ca, a aañeeɗa jiiniica, a tumeeɗa in feyohiɗ ca uupee haf caŋ ɓooɓa. Ini a fiis, wa mand na ini Maarko na Luk fiis.

Yegɗohiŋ Muci Macce fiis kaɗtiɗoh an :

- Findi Yeesu rimohu 1:1–2:23

- Ɓeeɗkohiŋ Yahya3:1-12

- Ɓoktukaŋ Yeesu na findi Seytaani jaɗɗohee ɗe fiir 3:12–4:11

- Nikaŋ Yeesu ŋ Galile na ɓak caŋ Tiir na Sidoon4:12–18:35

- Pulaŋ Yeesu Galile ne a kaɗ Yerusalem 19:1–20:34

- Aasaŋ Yeesu Yerusalem po kakaan kiŋ ɗe 21:1–27:66

- Hultiŋ Yeesu 28:1-15

- Dengkohiŋ Yeesu yakki 28:16-20

Faseehiŋ Yeesu Kiristaa

1 Cii ceɗ tiik ciŋ caacuuciŋ Yeesu Kiristaa*, setiŋ Dawuuda, setiŋ Ibrahiima.

2 Ibrahiima a yi rim Isaahha,✡

Isaahha rimmba Yaŋhooɓa,✡

Yaŋhooɓa rimmba Yudaa na taambɗoh ciŋ ɗe†.✡

3 Yudaa rimmba Seerah na Peeres, a rim ɓa na Tamaar.✡

Peeres rimmba Hesroon,✡

Hesroon rimmba Raam.✡

4 Raam rimmba Aminadaab,✡

Aminadaab rimmba Nahson,✡

Nahson rimmba Salmon.✡

5 Salmon rimmba Boos, a rim ɗe na Rahab,✡

Boos rimmba Obed, a rim ɗe na Riit,✡

Obed rimmba Yesay.

6 Yesay rimmba Dawuuda buuri,✡

Dawuuda rimmba Suleymaan, a rim ɗe na ɓiti Uri‡.

7 Suleymaan rimmba Robowaam§,

Robowaam rimmba Abiya,

Abiya rimmba Asaf.

8 Asaf rimmba Yosafat,

Yosafat rimmba Yoram,

Yoram rimmba Osiyas

9 Osiyas rimmba Yotam,

Yotam rimmba Ahas,

Ahas rimmba Esekiyaas

10 Esekiyaas rimmba Manasse,

Manasse rimmba Amon,

Amon rimmba Yosiyaas

11 Yosiyaas rimmba Yekoñas na taambɗoh ciŋ ɗe ŋ jamanoona Israayel ci toorsee Babilon.

12 Ŋ finho tooruukaŋ ɓa Babilon, Yekoñas rimmba Salacel,

Salacel rimmba Sorobabel

13 Sorobabel rimmba Abiyud,

Abiyud rimmba Eliyakim,

Eliyakim rimmba Asoor

14 Asoor rimmba Sadok,

Sadok rimmba Ahiim,

Ahiim rimmba Eliyud

15 Eliyud rimmba Eleyasaar,

Eleyasaar rimmba Mattaan,

Mattaan rimmba Yakob,

16 Yakob rimmba Suseef yi ƴaar Maryaama yi rim Yeesu, Yeesu yi na woyse Mucɗohi Gapohse*.

17 Fu marak ɗah, ca gomal ndaŋkiyaah na gomal nikiis (14) ŋ ini amboh ŋ Ibrahiima po ŋ Dawuuda. Ini nam kooɗoh ŋ Dawuuda po ŋ tooruukaŋ ɓooɓa ŋ Babilon ca gomal ndaŋkiyaah na gomal nikiis (14). Te ŋ tooruukaŋ ɓooɓa ŋ Babilon po ŋ Mucɗohi Gapohse ca gomal ndaŋkiyaah na gomal nikiis (14).

Raakuukaŋ Yeesu

18 Ŋ ini kaɗ ŋ Yeesu Kiristaa, a raakohu an : Maryaama yi yaay ɓa, a Suseef nguɗee cakiim nga ɗe ; waaye bala a tokan ɗe ɗah, wa nikka ne a rook ŋ tumohaaɗ ciŋ Fuuɗsi Hoolohngaani, Fuuɗsiŋ Kooh†.

19 Suseef yi fiir ce nikee ɓo' yurhiɗ. Ŋ ineem a waaɗɗi ɗe wiñ, a tufukka ne a reehiɗ harmban ɓa, ɓa daka ŋ kehƴi. 20 Wa a na liiɓsiɗohe ŋ ineem, malaaka Heɗ ɓoo teeɓukka ɗe ŋ heeƴ, woosa ɗe ne : « Suseef, setiŋ Dawuuda, kina neƴƴoh ɓay Maryaama ɓitiɓ, laam kuɓki nik ŋ rookiŋ ɗe a puloh ŋ Fuuɗsi Hoolohngaani. 21 A hey raake kuɓu ƴaar, teekaa ɗe Yeesu‡ laam a yi na hee mucɗe cuuɓiŋ ɗe ŋ bakaaɗ ciŋ ɓa. »

22 Ineem raakohha ɗaa, ne woo kiŋ Heɗ ɓoo, wi a taambɗee ŋ nguɓ woosuuɗ, raak an :

23 « Cafƴi inahɗi ƴaar,

hey ambe rook ;

a raak kuɓu ƴaar,

yi teeksan Emanuwel »✡

wi tokis : "Kooh yii na ɓoo".

24 Wa Suseef yunuk, a haɓiɗta ini malaakaaniŋ Heɗ ɓoo nakee ɗe ; a ɓayya Maryaama ɓitiɓ. 25 Waaye a hunɗi na ɗe po findi yeem raakoh kuɓu ƴaar, a teekka ɗe Yeesu.

Macce
<
1
>

✡^ Macce 9:9-10; 10:3; Maarko 2:14-15; Luk 5:27-29

*1:1 1:1 Kiristaa : marka ini fiisu ŋ ini kaɗ ŋ Mucɗohi Gapohse ŋ aaya 16.

✡1:2 1:2 Camba 21:1-3

✡1:2 1:2 Camba 25:21-26

†1:2 1:2 Israayel ci raakeen cuuɓ ndaŋkiyaah na cuuɓ kanak (12). Yudaa, na taambɗoh ciŋ ɗe ƴaar ci, ɓeɗ caac ciŋ cuuɓ ceem.

✡1:2 1:2 Camba 29:31–30:24; 35:16-18

✡1:3 1:3 Camba 38

✡1:3 1:3 Camba 46:12

✡1:3 1:3 Riit 4:19

✡1:4 1:4 Riit 4:19

✡1:4 1:4 Kind ci 1:7

✡1:4 1:4 Riit 4:20

✡1:5 1:5 Riit 4:21; Yosuwe 2

✡1:5 1:5 Riit 4:13-17

✡1:6 1:6 Riit 4:22; 1 Samuwel 16:11-13

‡1:6 1:6 Dawuuda faankeen na ɓiti ƴaari na woyse Uri, ɓitɓeem taambohha nga ammba rook. Dawuuda appa ƴaar ce, a tokka ɗe ɓitiɓ. Wa nikee bakaaɗ yakiɗ. Wa kuɓka rimuk, Kooh tummba a pesɗi, waaye kuɓkiŋ ɓa kanakɗoh Kooh teyɗukiɗ ɗe, a yi tumsee buur wi baab ɓa Dawuuda kuruk nga. Kuɓkeem a yi Suleymaan (marka teerndiŋ 2 Samuwel 11:2–12:24).

§1:7 1:7 Tiik ci amboh Suleymaan po ŋ Sorobabel, ini uup ŋ tiik ceem, ca ɗi ŋ teerndiŋ 1 Nguur ci 3:10-19.

*1:16 1:16 Mucɗohi Gapohse : "Masiyah" ŋ heber, weɗ toksu ndii "Mucɗohi Gapohse". Farañse toksoha "Messie", waar, "Almasi bi", weɗ ɓoyi kooɗu, ɓoyi yiifu diw ŋ hafiŋ ɗe ne a tufkiɗu findi buur wala seeƴkiɗoh wuu Kooh wala woosuuɗ ŋ Israayel (marka teerndiŋ Pula 40:12-15; 1 Samuwel 16:1-13; 1 Buur ci 19:16). Ɓi woosuuɗ, findi Esayi (Esayi 61:1) na Dañeel (Dañeel 9:26), woyeen ne "ɓo' yiifuuɗ" yii hay, a hey mucɗe ɓooɓiŋ Kooh, waaye ɓa woyeeɗi andi a na hee nike buur wala seeƴkiɗoh wala woosuuɗ wala in wiiriis. Ɓi uup ŋ Israayel ci kosee ne ɓoyeem na hee ɓa mucɗe ŋ yaah ciŋ ɓi Rom, te ɓa nikee sekeeɗa ɗe keeh-keeh. Fiis ciŋ Ambtiɗohi Asi teeɓoh ne e Yeesu Mucɗohi Gapohse, yi woosuuɗ ci woye, waaye muci a haytoh mandɗi na wa ɓooɓa liiɓe. Ŋ gerek, "ɓo' yiifuuɗ" na woyse "Kiristaa" te wa kaɗta po haa ne wa tiik nga ɗe. Kaɗta po wa nikka tiik ɗah, ɓoo na toksoheeɗi wa "Mucɗohi Gapohse", ɓoo na faɗe tiiki "Kiristaani" nga.

†1:18 1:18 Fuuɗsiŋ Kooh : ngaŋ heber na gerek, feruuɗ ci na hotkeeɗi, na puuɗsi, na liiɓ ɓo', ceɗ ɓaah tiik. Ŋ heber wa nikka "ruwah", ŋ gerek, wa nikka "pnewma". Kon, ɓa woo "ruwahiŋ Kooh wala pnewmaaniŋ Kooh ɗah, wa yooɓɗi tokis. A mand na liiɓi nik ŋ ɗooƴ Kooh, a mand na in ci na hotkeeɗi. Ngaŋ teerndiŋ Tum ci 2:2-4 "pnewmaaniŋ" Kooh hayiɗ findi puuɗsi. A yi ɓoo teek "Fuuɗsi Hoolohngaani" wala "Fuuɗsiŋ Kooh" ŋ saafi-saafi, waaye in ci kaahay ceem jen, ca ɗii ŋ ɗooƴi.

‡1:21 1:21 Tiikiŋ "Yeesu" tokis "Nikiɗi, a yi na mucɗohe".

✡1:23 1:23 Esayi 7:14