1 Anak koy lalaki, no ginarantyawan moy kapara mo ha otang na 2 ay sarili mon halità ya nakapiparakep komo. 3 Hapa-eg, anak ko, no ombayroy nangyari komo ay anti ka ha hilong kapangyariyan nin hatoy ginarantyawan mo. Emen ka makalibri ay ombayri ya gaw-en mo: manandalì kan mako kona ta makitotol kan ilibri na ka. 4 Agka matoloy o mamitiglep anggan agmo magawà. 5 Pa-alilihan moy pinakadakpan komo nin bilang ha pama-alilih nin oyha ha mangangaho boy bilang ha pama-alilih nin manokmanok ha ampanilò kona.

6 Hikay tawo ya matamlad, emen ka domonong ay pag-aralan moy pamamaraan nin aw-ayà. 7 Maski ayin ampamo-on ya ampagmanda konla, 8 peleg ka-ingitan ay ampagsikap hilan manipon pamamangan ya pangabagat la. 9 Piro hikay tawo ya matamlad, anggan makano kaboyot ya pangatoloy mo, boy makano ka mibangon ha pamimirà mo? 10 Tombay baytoy matamlad, ya wana, “Amò tanay pangatoloy ko boy pamitiglep ko.” 11 Piro ha pangangatoloy na ay ka-irapan ya biglà lomateng kona nin bilang ha mananakaw ya naka-armas nin manakaw.

12 Hay mala-et boy ayin kowintan tawo ay antomalà nin magtotol kabongkokan. 13 Hay mata na, bitih, boy gamet ay anggamiten nan pagsinyas na emen ya makaloko, 14 ta pirmin kala-etan ya anti ha nakem na boy kagolowan ya anggaw-en na. 15 Banà bayri ha gawgawà na ay ma-in biglà lomateng kona ya alwan maganday pangyayari. Hiya ay ahè malibri boy ayin anan rimidyo kona.

16 Ma-in anem ya bagay ya angka-inakitan nin Pangino-on; ah! Alwa kalì anem no alwan pitoy bagay ya ampamahangan na. 17 Habaytoy pitoy bagay ay ombayri: mapagmatag-ay ha kapara, mabongkok, mapamati nin tawoy ayin kasalanan, 18 pirmin ampagplanon mala-et, maparan manggawà kala-etan, 19 manistigos nin kabongkokan, boy mami-a-away.

20 Anak koy lalaki, honolen mo boy agmo liwawan ya an-ipanogò komo nin mawmato-antawo mo. 21 Itanem mo ha nakem mo boy gaw-en mo nin emen ha kolinta, 22 ta habayto ya mangitoto komo ha pantomalà mo. Ahè ma-alih komo maski angkatoloy ka, boy ha pamimata mo ay mag-in wawali komo. 23 Hatoy tawtorò nin mawmato-antawo mo ay emen hilag ya ampambin hawang komo, boy hay disiplina la ay makapitoto komo ha kahampatan. 24 Habayto et ya mangi-atap komo ha babayi ya mala-et boy ha mangalahap ya hawhalità nay pangingganyo komo. 25 Agka mag-intris ha ganda na boy agka ma-ibeg ha tegteg na. 26 Hay babayi ya pota ay angka-arì bayaran nin emen bongat ha alagà nin tinapay, piro hay pamabayi ay ampangibatan nin hay manga-alagà ya bagay ha biyay nin lalaki ay ma-alih.

27 Warì ahè mapo-olan ya dolo nin mihay lalaki no hay pantan nan bawbayah ay ilaret na ha nebneb na? 28 Ahè warì mapilah ya bitih na no mowako ya ha bawbayah? 29 Ombayro kapiligro ya mamabayi nin ahawa nin ma-in ahawa. Hinoman ya manggawà nin ombayro ay ahè ma-arì nin agya parosawan. 30 Ma-arì mapatawad ya nanakaw nin pamamangan no hay bara-nan nin panakaw na nin habayto ay mabitil ya. 31 Piro no narakep ya ay dapat nan i-orong nin kapitoy bisis baytoy tinakaw na. Kayà kaganawan nin ma-in kona ay ma-arì nan ma-obon igwà. 32 Hay ampamabayi ay tangah ta anhira-en nan bongat ya sarili na. 33 Ma-alih ya dangal na, bogbogen ya, boy hay tawtawo ay agana magrispito kona. 34 Hay pangimon ay ampakapapahang. Ahè ma-anggawan ya pahang nin ahawa nin nakilalaki boy ayin anggay pangganti na. 35 Ayin maka-alih nin pahang na maski bayaran ya boy maski anya et ya irigalo kona.