1 Anak koy lalaki, honolen moy anhalita-en ko komo. Etpanan mo bayti emen agmo maliwawan. 2 Honolen moy anhalita-en ko emen homampat ya biyay mo. Paka-atap ka ha panhohomonol mo ha tawtorò ko nin bilang pangi-atap mo nin mata mo. 3 Pangoligtanan moy tawtorò ko boy itanem mo ha nakem mo. 4 Hay karonongan ay itoring mo nin bilang ha patel moy babayi, boy hay pangingintindi ay itowad mo nin bilang ha maheney amigo mo.

5 No pangoligtanan moy karonongan ay matoto kan mag-atap ha babayi ya mala-et boy agka ma-ingganyo nin hawhalità nay mangalahap. 6 Minghan, hiko ay ampanamolaw ha dorwangan nin bali ko. 7 Ma-in akon nakit ya aw-anakabayo ya hay miha konla ay nalili-o ko ya ayin tinandà. 8 Hiya ay ampowako ha kalsara ya marani ha kanto nin ampa-iriyan nin babayi ya pota. 9 Hin habayto ay ampi-ayoy mahawang boy mareglem ta anyomabi ana.

10 Hapa-eg, ma-in babayi ya napakarani kona ya hay holot ay bilang holot nin babayin pota boy poro panloloko ya annakemen na. 11 Hiya ay malablab, ayin kareng-eyan, boy ahè ampagpirmi ha pamamali. 12 Amò papa-inghan ay anti ya ha kalsara; totongna, anti ya ha plasa; amò papa-inghan ana et ay anti ya ha kanto ta ampangabang nin maloko na.

13 Hapa-eg hatoy anakabayoy ayin tinandà ay na-antì na. Hinagep na ya biha na inalekan, boy pinakategteg na ya ta hinalità na kona, ya wana, 14 “Hapa-eg allo ay tinopad koy pangakò ko boy ma-in akon inhandà ya pamamangan; 15 kayà anti ko bayrin ampanikap komo. Mahampat ta nakit kata. 16 Inapinan koy pamira-an ko nin makodpaw ya doloy di kolor ya ibat ha Ihipto. 17 Pinabangohan ko et nin ma-alagà ya pabangoh ya an-ingaten mira, alowi, boy kanila. 18 Kayà mako kaynari ta magpakaliga ta anggan bayombokah. 19 Hay ahawa ko ay ayin bayri ha bali ta marayò ya tinalà na. 20 Nagbawon yan malakè ya kowalta ta agya morong anggan ahè magkabilogan ya bowan.”

21 Hapa-eg, ha kagalingan nan mag-ilgo ay nagaygay na baytoy anakabayo nin hawhalità nay mangalahap. 22 Antimano, hiya ay hinomono kona nin bilang ha toroy bakà ya gitan patyen, o bilang ha oyha ya an-omarap ha kamatyan 23 ta hay yawò ay nakapatoyò ha posò na. Emen ya et ha manokmanok ya ampagpalako ha hilò ya agna tandà ya hay biyay na ay ampamiligro. 24 Kayà aw-anak koy lalaki, leng-en moyoy anhalita-en ko boy honolen moyo. 25 Agmoyo ipakilalakoy nakem moyo ha ombayroy babayi. Agkawo makilalako kona. 26 Hiya ay nanirà nin malakè ya lalaki boy agana mabilang ya nati nin banà kona. 27 Hay bali na ay emen ha dogal nin nikati; kayà no lakwen moyo ay emen kawon ampako ha kamatyan moyo.