1 Poriyen moyoy Pangino-on.

Hikawoy mawmagsisirbi nin Pangino-on, poriyen moyoy ngalan na.

2 Hay ngalan nin Pangino-on ay poriyen pa-ibat hapa-eg anggan makakanoman. 3 Pa-ibat baytan anggan babà, kaganawan tawo ay mamori ha ngalan nin Pangino-on. 4 Hay Pangino-on ay ampamo-on ha kaganawan nasyon; hay kagandawan na ay ayin kapantay.

5 Ayin makapakipantay ha Pangino-on nawen Diyos; hiya ay ampiknò ha trono na ya anti ha katatag-ayan, 6 boy pa-ibat bayro ay anlonglongan nay langit boy lotà. 7 Hay manga-irap ay an-alihen na ha ka-i-ingaloy kapapa-hal; hay ampipanga-ilangan itaman ay an-itag-ay nay kapapa-hal. 8 Hila ay an-ilamo na ha tawtawo nay ampipamo-on ya mangatag-ay ya pagkatawo. 9 Hay babayi ya ba-og ya ma-in ahawa ay pinaliga nin Pangino-on, ta pinolalagan nan nagkama-in aw-anak.

Poriyen moyoy Pangino-on.