1-2 Hay aw-inalalak ni Hakob ya ayin kanayon no alwan Aw-israylita ay napa-iri hin hato ha nasyon Ihipto ya hay tawtawo bayro ay kahalakoy halità ha halità nin Aw-israylita. Hin nog-alih bayro ya Aw-israylita, hay dogal ya an-ingaten Hoda ay nag-in masagradoy dogal ya kama-inan nin Diyos, boy hay dogal ya an-ingaten Israyil ay ginawà nan pag-ari-an na.

3 Hin kowinta nakit nin Dagat ya Ma-orit ya Aw-israylita ya anlomateng, hay lanom nin hatoy dagat ay napihiyay; ombayro simpri ha lanom nin balah nin Hordan. 4 Hay bawbakil boy bawbakilbakil ay kowinta ampagtakompaw nin bilang ha toron kanding boy bilang ha oybon topa.

5 Antà napihiyay ya lanom nin Dagat ya Ma-orit, boy lanom nin balah nin Hordan? 6 Antà hay bawbakil boy bawbakilbakil ay kowinta ampagtakompaw nin bilang ha toron kanding boy ha oybon topa?

7 Hay babon lotà ay dapat mamegpeg, ta hay Pangino-on ya Diyos ya pinahimala-an ni Hakob ay anti bayro. 8 Hiya ya Diyos ya namahobol nin lanom ha bato, boy pina-agoh nay lanom ya nangibat bayro ha matyà ya bato.