38
Abadantaa šelaŋ Ayuba se
1 Abadantaa na Ayuba zaabi hewkuroo gamoo ra ka nee:
2 «May no ma hayey kaŋ ay baa yʼi tee, tee kubay
ka gar a sii nda hayey wey šennoo ra bayray?
3 Ni gamoo haw sanda wongaari,
ay ga ni hãa, mʼay fahamandi.
4 Man ra ni goo waatoo kaŋ ay ga aduɲɲa daaru?
A har ya ne nda nga bayraa goo ni ra.
5 May no ka nga diidaa kayandi?
Nʼgʼa bay wala?
May no ka karfu daŋ a ga kʼa neeši?
6 Macin ga nga asaasoo gorandi?
May no ka kanjoo tondoo gorandi
7 waatoo kaŋ subbaahi handarawey ga kaati nda ɲaali cere bande,
de Irkoy izʼarey kul ga kaati ka kobi?
8 May no ka teekoo daabu nda ganbuyaŋ
waatoo kaŋ a ga hun ɲaŋoo gundoo ra,
9 nda waatoo kaŋ ay na duula tee nga bankaaraa
nda ka duula bibi tik tee a se zaara kaŋ gʼa daabu,
10 nda waatoo kaŋ ay na hirri kayandi a se
ka kufalyaŋ nda ganbuyaŋ daŋ a ga,
11 nda waatoo kaŋ ay nee: ‹Nʼga kaa hala ne, amma nʼsi bisa a ga,
ne ra ni bolsaa bondawey ga kay›?
12 Za ni huru aduɲɲa ra, ni bay ka zaaroo yaamar wala?
Ni bay ka alfazaroo cebe nga dogoo,
13 hala a ma duu ka too gandaa kungawey do,
de boro laaley ma kokobandi wala?
14 Haya kul takaa ga bere
sanda boro kabe-izoo ma tammaasa daŋ labudiinoo ra,
a ga tee sanda boro kaŋ na bankaaray daŋ ka pari.
15 Boro laaley si duu ngi gaayoo,
kaboo kaŋ i nʼa jer ga kayri.
16 Ni too hala teekoo hundogoo ra?
Ni yaara-yaara teekoo cire?
17 Buuyanoo hugoo miɲey feerandi ma ne wala?
Ni dii buuyan biyoo hugoo miɲey wala?
18 Nʼna gandaa hayyanoo laasaabu wala?
Nda nʼga woo kul bay, a har ya ne.
19 Man fondaa kaŋ ga koy gaayoo gorodogoo ra?
Man ra kubawey ga goro,
20 hala ma duu ka dii ngi kaydogoo,
de ma faham ngi hugey fondaa se?
21 Šikka sii a ra kaŋ nʼgʼa bay, zama a gar ni hayandi,
ni kaŋ gay nʼga bara!
22 Ni too nongoo kaŋ ra neežoo ga fanji wala?
Ni dii garey fanjidogoo wala?
23 Ya nka wey daŋ jere ga kankamyan waati se,
tangam nda wongu zaari se.
24 Man fondaa kaŋ nda gaayoo ga fay,
fondaa kaŋ nda dandi hewoo ga say laboo ga.
25 May no ka fondo tee ncirɲi harey se,
ka fondaa tee meley jiŋjiŋey se,
26 ka ncirɲi kaŋandi labu ga kaŋ ra adamize sii,
saaji ra kaŋ ra hundikoyni sii,
27 ka nongu koonay nda nongu kogey haŋandi hari,
ka subu bagu kʼa fattandi?
28 Ncirɲi goo nda baaba wala?
May no ma harandaŋ lotey tee?
29 Gunde dumi foo ra galaši hun?
May no ka beenaa gari baanaa tee?
30 Waatoo woo ra, harey ga kogu ka tee sanda tondi,
guusey beeneheroo kogandi i ma cere dii.
31 Nʼga hin ka konni waati handarawey marga kʼi haw cere ga
wala ka kaydiya waati handarawey fay?
32 Nʼga hin ka handarawey fattandi ngi waatoo ga wala?
Nʼga hin ka hawsa handarawey nda ngi izey gongu?
33 Nʼga beenaa ašariyawey bay wala?
Ni no ma ngi goyoo juwal laboo ga wala?
34 Nʼga hin ka ni jindoo jer hala duulawey ra,
hala i ma ni sufa ncirɲoo haroo ra wala?
35 Nʼga meley sanba ngi dogoo ra wala?
I mma nee ma ne: ‹Ir goo ne›?
36 May no ka lakkal daŋ bine kuneheroo ra,
may no ka fahamay daŋ boro binoo ra?*38.36 May no ka lakkal daŋ bine kuneheroo ra, may no ka fahamay daŋ boro binoo ra?, Ebere šenni ra, almaganaa faa ti May no ka lakkal daŋ ciraa kaŋ se i ga nee ibis ra, may no ka fahamay daŋ gorgo ra? Ngi ciraw hinkaa kul manʼti kala kaydiyaa šintinoo tammaasa Misira borey se.
37 May bara nda lakkal ka duulawey kabu,
ka beenaa hunbarey šiiri ka harey doori,
38 hala labutaasoo ma tee batakara
de labu gungutey ma denji cere ga?
39 Ni no ma hoogawey dii ganjihayla woyoo se wala?
Ni no ma heray kaa ganjihayla soogey ga,
40 waati kaŋ i ga fom ngi guusoo ra,
waati kaŋ i goo ngi tugudoo hawsa tafayantaa ra wala?
41 May no ma gaaru-gaaru noo nga ŋaahayaa,
waati kaŋ izey ga kaati ka Irkoy cee,
nongu kul kaŋ here i bere i ga baa ka buu heray?»
*38:36 38.36 May no ka lakkal daŋ bine kuneheroo ra, may no ka fahamay daŋ boro binoo ra?, Ebere šenni ra, almaganaa faa ti May no ka lakkal daŋ ciraa kaŋ se i ga nee ibis ra, may no ka fahamay daŋ gorgo ra? Ngi ciraw hinkaa kul manʼti kala kaydiyaa šintinoo tammaasa Misira borey se.