1 «Nʼga waatoo bay kaŋ ra ganjihanciney ga hay wala?

Nʼga jeerey guna waati kaŋ i ga ize tee wala?

2 Nʼga handey hinnaa bay kaŋ izey gʼa tee gundey ra wala?

Nʼga waatoo bay kaŋ ra i ga hay wala?

3 I ga gunguma ka ize hay

ka hun ngi hayyan kuubey ra.

4 Ngi izey ga duu gaabi ka beeri hawsaa ra,

i ga mooru ngi do, de i si willi kate ngi do koyne.

5 May ka ganjifarkaa naŋ a ma koy?

May ka ganjifarkaa feeri?

6 Ay na ganganoo tee nga hugoo,

ka labu ciiri-ciirantaa tee nga gorodogoo.

7 A ga haaru koyraa wurroo ra,

a si maa gongukaw kaatey.

8 A ga tondi hondey dira ka nga ŋaahayaa ceeci,

subu firzi kul no a gʼa ceeci.

9 Ganjihaw ga yadda ka goy ma ne wala?

A ga cijinoo tee ni alman ŋaa jinaa jere wala?

10 Nʼga ganjihaw haw hala a ma beeri ma ne wala?

A ga yadda ka beeriguuru cendi ni bande goorey ra wala?

11 Nʼga felle a ga, zama a goo nda gaabi beeri wala?

Nʼga ni goyoo naŋ a se wala?

12 Nʼga naanay a kaŋ a ga kate ni taasoo kul

kʼa marga ni taasu kar ganganoo ra wala?

13 Taatagay fatawey ga kobi nda ɲaaliyan,

a ga hima nda alwaaliya fata hinbirey wala.

14 Amma taatagay ga nga guurey fur laboo ra kʼi naŋ,

a gʼi naŋ i ma koron laboo ra.

15 A ga dirɲa kaŋ cee ga hin kʼi motti,

ganjihooga tana ga hin kʼi taama.

16 A ga šendandi nga izey ga sanda manʼti nga izey no,

a si hunbur nga fararoo ma tee yaada.

17 Zama Irkoy nʼa jaŋandi lakkal,

a mana fahamay daŋ nga bagaa ra.

18 Waati kaŋ a tun ka sar,

a ga baryoo nda nga kaarukaa haaru.

19 Ni no ma bari noo gaabi,

ni no ma jindoo bankaaray nda hinbiri?

20 Ni no ma kate a ma sar sanda ndoo?

Nga hunsar beeroo ga hunburandi.

21 A ga zankam gooroo ra,

a ga ɲaali nda nga gaaboo.

A ga nga boŋ warra wongu jinawey jine.

22 A ga hunburay ɲooɲo, binoo si dunbu,

a si yee takuba se banda.

23 Nga ga wongu jinawey kaŋ hun tongoo ra ga kara-kara,

maanaa yaaji nerantaa nda yaaji-izoo.

24 A sar nda gaabi, a ga farroo gon.

A si hin ka nga boŋ dii hilloo hẽenoo ga.

25 Waati kaŋ hilloo ga hẽe, a mma nee: ‹Ir ma koy!›

A ga kay nongu mooro ra ka maa wongoo hewoo,

wongoo jineborey wurroo nda ngi kuwwaa.

26 Ni lakkaloo no ma kate algabu ga deeši

ka nga fatawey feeri ka koy gurma here wala?

27 Ni yaamaroo ga, dutal ga deeši beene

ka nga tejoo cin nongu jerantey ra wala?

28 Tondey ti nga gorodogoo, ngi ra a ga cijinoo tee,

a ga nga nongu gaabantaa tee tondoo hiɲoo ra.

29 No din ga a ga nga ŋaahayaa monno,

nongu mooro ra moɲey ga dii a.

30 Nga izey ga kuri haŋ,

nongu kaŋ ra jifa goo, ra a goo.»