40
1 Abadantaa yee koyne ka Ayuba zaabi ka nee:
2 «Boraa kaŋ ga kay Abadantaa se,
a ga yadda ka šelaŋ a ga wala?
Boraa kaŋ ga citi Irkoy bande ma tuuru.»
Ayuba na Abadantaa zaabi
3 Ayuba na Abadantaa zaabi ka nee:
4 «Agay manʼti baffoo, cin no ay ga hin kʼa har ni jine?
Ay gʼay kaboo daŋ ay miɲoo ga.
5 Ay šelaŋ cee foo, ay si zaabi koyne,
ay šelaŋ cee hinka, ay si tonton a ga.»
Cee hinkantoo kaŋ Abadantaa šelaŋ Ayuba se
6 Abadantaa na Ayuba zaabi hewkuroo gamoo ra ka nee:
7 «Ni gamoo haw sanda wongaari,
ay ga ni hãa, mʼay fahamandi.
8 Nʼga baa ma nee kaŋ ay ciitoo si henan?
Nʼga baa ma nee kaŋ ay tooɲe, ka ni boŋ noo cimi?
9 Ni kaboo ga too Irkoy wanoo,
ni jindoo ga too jiŋjiŋyanoo sanda takaa kaŋ Irkoy wanoo ga ti a wala?
10 Ay gʼa wiri ni ga, ma ni boŋ taalam nda beeray nda darža,
darža nda jeryan daŋ ni ga sanda darbay!
11 Ni futuroo doori borey ga,
hundi beerey kul guna mʼi yeeti ganda!
12 Hundi beerey kul guna mʼi kaynandi!
Boro laaley motti dogoo din da.
13 Mʼi kul tugu laboo ra,
i daabu buuyan hugoo ra!
14 Nda woo teendi, agay hunday ga albarka tee ma ne,
zama ni kabe gumaa na ni hallasi!
15 Adabba kaŋ ga too nbaŋa guna, ay nʼa tee sanda ni!
A ga subu ŋaa sanda haw.
16 Gaaboo guna kaŋ goo baggaley ra
nda gaaboo kaŋ goo gundoo hamoo ra.
17 A ga nga nsunfaa kayandi sanda sedere tuuri,
nga cee linjey ga žigi-žigi cere ga.
18 Nga birey ga hima nda alhan tiyoo,
caraw birey ga hima nda guuruyaŋ.
19 A bisa Irkoy takarey kul,
boraa kaŋ nʼa tee nʼa noo takuba.
20 Nga ŋaahayaa si hun a se kala tondi hondey ra,
nongoo kaŋ ra adabbawey kul ga hooray.
21 A si kani kala tuurey cire,
i gʼa daabu nda isawey kakaarey.
22 Tuurey gʼa gum nda ngi biyoo,
a ga isa tuurey kaŋ ga hima nda turaariɲaa kuubi kʼi bere.
23 Ba nda haroo boosu ka laala, a si hunbur,
nda Žurdeŋ isaa na nga boŋ warra miɲoo ra, haya kul si duu a.
24 Boro ga hin kʼa dii waati kaŋ moɲey ga hay wala?
Kʼa dii nda kumsay, ka niinoo fun?
25 Nʼga hin ka hari dragoŋoo dii nda delbu wala?
Nʼga hin ka deenoo haw nda delbulinji?
26 Nʼga hin ka kakaaru daŋ niinoo ra?
Nʼga hin ka warkandoo fun nda korbay?
27 A ga wiri ni ga, ma nga taŋ wala?
A ga šenni kaanayaŋ har ma ne wala?
28 A ga amaana tee ni bande
hala mʼa dii baɲɲa hala abada wala?
29 Nʼga hooray a bande sanda ciraw wala?
Nʼgʼa haw ni ize woy soogey se wala?
30 Sorkey kondaa gʼa daŋ yooboo ra wala?
I gʼa zamna maamalakey game wala?
31 Nʼga kuuroo hay nda yaaji wala?
Nʼga boŋoo hay nda harji wala?
32 Ni kaboo tuku a ga,
nʼga cindi ka hongu tangamoo woo,
de mo nʼsʼa tee koyne!»