41
1 «Hawgay! Nga here haya kul kaŋ nʼnʼa hongu manʼti kala yaada,
ba nda ni dii a hinne, nʼga kaŋ.
2 Boro kul sii nda bine kʼa tooɲe,
may no ma hin kʼay kakaw?
3 May mʼay hãa garaw hala yʼa yeeti a se?
Haya kul kaŋ goo beenaa cire manʼti kala agay wane.
4 Ay si dangay haya kaŋ ti nga kunturoo here,
nda nga sahãa, nda nga gaahamoo booroo.
5 May ka nga bankaaraa kaa a ga?
May ma huru nga warkandey nda cere game?
6 May ka hin ka miɲoo feeri?
Hiɲey nda cere game ti hunburay.
7 Koray gaabante bolsantey
ga hawa cere ga sanda tammaasa bara i ga.
8 I ga denja-denja cere ga,
ba hew si bisa gamey ra.
9 I ga hawa cere ga,
i ga cere dii hala nongu kaŋ ra i si fay.
10 Nga tišawyaney ga gaay tee,
nga moɲey ga hima nda alfazaroo gaayoo.
11 Nuune deeneyaŋ no ma fatta miɲoo ra,
nuuneyaŋ no ma fatta a ra.
12 Dullu no ma fatta niiney ra
sanda kusu kaŋ ga zarga, alforon konna.
13 Nga meehewoo ga denji bibi diinandi,
nuune ga fatta miɲoo ra.
14 Gaabi goo jindoo ra,
hunburay ga jeekar jinoo ra.
15 Nga gaahamoo taabarey goo cere ga,
i ga denji a ga, i si ɲuuti.
16 Binoo ga šendi sanda tondi,
a ga šendi sanda fufutondey ganda wanoo.
17 Nga jine ba hinikoyey ga hunbur,
de i ga jiti, i ga tugu.
18 Ka too a do nda takuba, wala yaaji,
wala harji, wala biraw sii nda alfayda.
19 Guuru ga hima nda a se sanda subu,
alhan ga hima nda a se bundu funba.
20 Biraw sʼa zurandi,
fizza tondi ga hima a se subu.
21 Gobu ga hima a se subu,
a mma yaaji hẽenoo haaru.
22 Ponti mee cuutayaŋ goo a cire
sanda taasu kar bundu kaŋ goo batakara ra.
23 A ga hari guusaa zargandi sanda kusu,
a ga teekoo bere kʼa tee sanda turaari kulba.
24 A ga farru kaŋ ra gaay goo naŋ nga dumaa ga,
hari guusaa beeneheroo ga hima nda aru žeenaa hinbiri kaaray.
25 Boro kul si tee a se boŋkoyni laboo ga*41.25 Boro kul si tee a se boŋkoyni laboo ga, Ebere šenni ra, almaganaa faa ti Nga cine sii laboo ga.,
a nka teendi a masi hunbur haya kul.
26 A ga takahaya beerey kul tenje kʼi guna,
ganjihoogawey kul kokoyoo no.»
*41:25 41.25 Boro kul si tee a se boŋkoyni laboo ga, Ebere šenni ra, almaganaa faa ti Nga cine sii laboo ga.