42
Ayuba na Irkoy noo cimi
1 Ayuba na Abadantaa zaabi ka nee:
2 «Ay ga bay kaŋ nʼga hin haya kul,
miile kul si dere ma ne.
3 Ni nee: ‹May no ma hayey kaŋ ay baa yʼi tee, tee kubay?›
Nda cimi, ay na hayayaŋ har kaŋ ya na faham i se.
Ay na hayayaŋ har kaŋ bisa agay,
ya nka sʼi bay.
4 Ni nee: ‹Ay ga wiri ni ga, haŋajer, agay no ma šelaŋ sohõ.
Ay ga ni hãa, mʼay fahamandi.›
5 Ay haŋawey maa šennoo kaŋ i gʼa har ni ga,
amma sohõ, ay moɲey dii ni.
6 Woo maaganda se, ay tun a ga,
ay gʼay boŋ yeeti ganda ka goro labu nda boosu ra.»
Abadantaa na Ayuba willi gomni žeenaa kaŋ ra a cindi
7 Waatoo kaŋ Abadantaa na šenney wey har Ayuba se ka ben, Abadantaa nee Elifaz, Temaŋ boraa se: «Ay futu ni nda ni cere hinkaa ga, zama war mana šelaŋ ay ga nda cimi, sanda takaa kaŋ ay tamoo Ayuba nʼa tee. 8 Sohõ, wa yaaru kobsi iyye nda gaaru boŋ iyye zaa, war ma koy ay tamoo Ayuba do, war ma sargari kukurante kaa war boŋ se. Ayuba, ay tamoo gʼay ŋaaray war se, nga sabbu se ay si war dii nda war hollokomtaraa, zama war mana šelaŋ ay ga nda cimi sanda takaa kaŋ ay tamoo Ayuba nʼa tee.» 9 Elifaz, Temaŋ boraa, nda Bildad, Šuwa boraa, nda Sofar, Naama boraa koy. I nʼa tee nda takaa kaŋ nda Abadantaa nʼa har. Abadantaa na Ayuba ŋaarayroo yakubar.
10 Waatoo kaŋ Ayuba na Irkoy ŋaaray nga cerey se, Abadantaa nʼa willi gomni žeenaa kaŋ ra a cindi. Almanoo kaŋ bay ka cindi a se, Abadantaa nʼa noo nga cine hinka ka bisa cee jinaa wanoo. 11 Nga armey kul, nda nga woymey kul, nda borey kul kaŋ gay i gʼa bay kaa a do ka ŋaa a bande nga hugoo ra. I na hinneyan cebe a se ka binoo yaynandi bonawey kul ra kaŋ Abadantaa naŋ i ma duu a. Ngi affoo kul nʼa noo nzorfu tamma foo nda wura korbay foo. 12 Abadantaa na albarka daŋ Ayuba kokoroo ra ka bisa nga šintinoo waati. A duu alman buuna boŋ zenber woy cindi taaci (14.000), nda yoo zenber iddu (6.000), nda haw kobsi hinka-hinka zenber foo (1.000) nda farka woy zenber foo (1.000). 13 A duu izʼaru iyye nda ize woy hinza. 14 A na ize woy jinaa maaɲoo daŋ Yemima*42.14 Yemima maanaa ti tuuzun-ize., ihinkantoo a na maaɲoo daŋ Kesiya†42.14 Kesiya maanaa ti waakondoo kutukurya., ihinzantoo a na maaɲoo daŋ Keren-Hapuk‡42.14 Keren-Hapuk maanaa ti fina kulba.. 15 Gandaa kul ra, woy sii no kaŋ ga boori ka too Ayuba ize woyey. Ngi baabaa na ngi nda ngi armey kul sawandi nga tuboo ra.
16 Hayey wey banda ga, Ayuba huna koyne jiiri zangu nda woytaaci (140). A dii nga izʼarey nda nga izʼarey izʼarey hala alwadda taacantoo ga.
17 Ayuba faati aloomur kuku banda ga.