4
Lakkal bisa haya kul
1 Ay izʼarey, wa haŋajer baaba hoyraa se,
wa hawgay hala war ma faham lakkal se,
2 zama ay na war noo bayray henna,
war masʼay cawandoo naŋ.
3 Waatoo kaŋ ay goo zankataray ra,
kaŋ ay goo ay baabaa cire,
ay takaa ga kan ay ɲaa se sanda izʼaru bajja foo.
4 Ay baabaa gʼay cawandi, a nee ya ne:
«Ni binoo ma gaabu ay šenney ga.
Ay yaamarey dii, ma huna.
5 Duu lakkal, duu fahamay,
masi tee dirɲante, masi šiiri ay miɲoo šenney se.
6 Masʼa naŋ, a ga ni hawgay,
bagʼa, a ga ni hallasi.
7 Lakkal duuyan šintinoo ti:
ma gaabandi ka lakkal ceeci,
haya kul kaŋ goo ni kone mʼa ka fahamay ceeci.
8 A beerandi, a ga ni jer,
a ga ni daržandi nda ni denji a ga.
9 A ga fatala alhormante ka ni boŋoo taalam,
a ga ni noo kokoy fuula daržante.»
Ni boŋ hawgay boro laaley fondaa ga
10 Haŋajer, ay izʼaroo, gaabu ay šenney ga,
nʼga duu aloomur kuku.
11 Ay na lakkal fondaa cawandi ma ne,
ay na ni daŋ fondo šerrantaa ga.
12 Nda nʼga dira nʼsi kati ni cee diraa ra,
nda nʼga zuru nʼsi tatanji.
13 Gaabandi hoyray bande, masʼa naŋ,
gaabu a ga, zama nga ti ni hunaroo.
14 Masi boro futawey dira takaa guna ka dira,
masi dira boro laaley fondaa ra.
15 A naŋ, masi bisa nda no din,
mooru a ga, bisa.
16 Zama i si jirbi nda manʼti i nka goy futu tee,
i ga jirbidunbay nda i mana duu boro kaŋ i nʼa kaŋandi.
17 Zama ifutu de ti ngi meehunaa,
ifutu kaŋ ga hun alaneb hari mooro ra no i gʼa haŋ.
18 Boro šerrantey fondaa ga hima nda alfazar gaayoo
kaŋ mma koy de a ga tonton ka nere hala zaaroo ra.
19 Boro laaley fondaa ga hima nda kubaa,
i si hayaa bay kaŋ ga ngi kaŋandi.
Dira taka hennaa
20 Ay izʼaroo, lakkal daŋ ay šenney se,
ni haŋaa gaaru hayey kaŋ ay gʼi har se.
21 Masi naŋ i ma hun ni moɲey cire,
i dii ni binoo kunehere.
22 Zama hunayan no borey se kaŋ duu ey,
gaaham baani no ngi hamoo kul se.
23 Ma ni binoo hawgay ka bisa haya kul,
zama ni hunaroo hayey kul si hun kala nga ra.
24 Ni miɲoo moorandi taari,
darga šenni moorandi ni ga.
25 Yala ni moɲey ma ni tenjoo guna,
yala ni moogunaa ma šerre ka ni jinoo guna.
26 Fondaa kanandi ni cewey se,
ni fondawey kul ma tabati.
27 Masi šiiri ka koy ni kabe gumaa wala iwaawaa ga,
ni cewey moorandi ifutu.