1 Ay izʼaroo, lakkal daŋ ay šenney se kaŋ ga ni noo lakkal,

ni haŋa gaaru ay šenney se kaŋ ga ni noo fahamay,

2 hala ma gaabu miile taka henna ga,

de ni miɲoo ma bayray dii.

3 Zama woy waani meefendey, yuu no ma loti ka hun i ra,

miɲoo ga yuttu ka bisa jii,

4 amma nga kokoroo ga hottu sanda kanihotta,

a ga boro maray sanda takuba mee hinkakoyni kaana.

5 Cewey si zunbu ka koy kala buuyan here,

nga ceetaamey mma šerre hala alaahara.

6 A si hunayan fondaa laasaabu,

nga fondawey ga boro derandi bila nda a ma bay.

7 Adiši sohõ, ay izʼarey, wa haŋajer ya ne,

war masi mooru ay miɲoo šenney.

8 Ni boŋ moorandi woyoo woo dumoo,

masi man nga hugoo miɲoo,

9 hala ni beeraa, masi koy a noo boro tanayaŋ se,

ka ni aloomuroo noo boro futu se,

10 hala yawyaŋ masi koy kungu ni almanoo ra,

de ni farabagaa ma tee hugu waani wane.

11 Kokoray ga, masi koy guray

waati kaŋ ni hamoo nda ni kunturoo benandi,

12 de nʼga nee: «Taka foo nda ay konna hoyray?

Taka foo nda ay binoo hin ka tejeyaney kaynandi?

13 Taka foo nda ya na hin ka haŋajer agay alfagey se,

kʼay haŋaa gaaru ay cawandikey se?

14 Haya kayna ka cindi bone dumi kul ma duu agay

jamaa nda margaroo jine.»

15 Ni botoloo haroo haŋ,

woo kaŋ ga hun ni dayoo ra!

16 Macin se ni haroo ga doori yaada taray,

ni hari bisadogey ga doo farrey ra?

17 Yala i ma tee ni hinne wane,

i masi tee yawyaŋ wane ni bande.

18 Yala albarka ma huru ni hari hundogoo ra,

ɲaali nda ni soogataray woyoo.

19 A ga hima nda ganjihancin boryo nda jeeri henna.

Waati kul nga fafey ma ni sakkarandi,

nga bajoo ma ni suwandi.

20 Ay izʼaroo, macin se ni bajoo ga hanga woy waani?

Macin se nʼga ni boŋ naagu woy kaŋ nʼsʼa bay gandey ga?

21 Zama Abadantaa jine adamize kul fondawey goo,

nga no ma nga dira takawey kul laasaabu.

22 Boro laala, nga laybey no mʼa dii,

nga zunubey karfey gʼa haw.

23 Nga, a ga buu, zama a mana yadda ka cawyan dii,

a ga dere nga lakkal jaŋantetaraa beeriyanoo sabbu se.