8
Boro kul ga hima ka lakkal ceeci
1 Manʼti lakkal mma goo ma ciya wala?
Manʼti bayray mma goo ma nga jindoo kaataray wala?
2 A ga kay nongu jerantey ga fondawey ra,
a ga kay nongey ra kaŋ ga fondawey ga cere kubay.
3 Koyraa miɲey jere, koyraa miɲey here,
a ga kaati ka nee:
4 «Borey, war no ay ga kaati ka war cee,
adamizey ga ay goo!
5 Boŋbiyey, wa caram,
lakkal jaŋantey, wa duu lakkal!
6 Wa haŋajer, zama haya kayanteyaŋ goo no
kaŋ ay gʼi har,
ay gʼay miɲoo feeri ka haya har war se kaŋ ga šerre.
7 Zama ay miɲoo ga cimoo har,
laalay manʼti kala almuhal ay meetuwey se.
8 Ay miɲoo šenney kul ga šerre,
šiiriyan wala golbi kul sii i ra,
9 i kul ga henan boro se kaŋ goo nda lakkal,
i ga šerre boro se kaŋ goo nda bayray.
10 Wʼay hoyrawey dii ka bisa nzorfu kaaray,
war ma bayray dii ka bisa wura suubante.
11 Zama lakkal baa hiiri caadante,
haya kul kaŋ boro ga bagʼa si toorʼa alkadar.»
Hayaa kaŋ lakkal gʼa tee boro se
12 «Agay, lakkal, agay nda fahamay no ma goro nongu foo,
ay ga takaa bay kaŋ nda lakkalkoyni miilewey ga duwandi.
13 Ka hunbur Abadantaa manʼti kala ka konna ifutu,
boŋ beerandi, nda bolsay, nda fondo futu, nda deenebeeray,
wey, ay ga konna ey.
14 Hoyray nda bayray henna ti agay wane,
agay ti fahamay, gaabi ti agay wane.
15 Agay albarkaa ra kokoyey ga laama,
boŋkoyney ga ašariya šerranteyaŋ kaataray.
16 Agay albarkaa ra jineborey ga goro hinoo ra,
nda boŋkoyney, maanaa laboo ciitikey*8.16 laboo ciitikey, hantum fooyaŋ ga nee ciitikaw šerrantey. kul.
17 Agay, ay ga baa borey kaŋ ga baa agay,
borey kaŋ gʼay ceeci ga duu agay.
18 Agay do alman nda darža goo,
nda gomni kaŋ ga gay, nda šerretaray.
19 Ay nafaa bisa wura, ba wura alhakiika,
hayaa kaŋ ay ga kate a bisa nzorfu kaaray suubante.
20 Ay si dira kala šerretaray fondaa ra,
ka bisa fondawey ra kaŋ ra cimi goo,
21 ka borey kaŋ ga baa agay noo tubu
ka ngi alman jisidogey too met.»
Lakkal si hun kala Irkoy hunday do
22 «Abadantaa duu agay za nga fondaa šintinoo ga
za a mana nga goy jina-jinawey tee.
23 Ay goro za zaman,
za šintinoo ga, za laboo mana takandi jina.
24 Ay hayandi za hari guusawey
nda hari hundogey kaŋ ga too nda hari mana tee.
25 Ay hayandi za tondi hondey mana gorandi,
za hondey mana bara,
26 za Abadantaa mana laboo, nda hawsawey,
nda aduɲɲa labu gurunbu jinaa tee.
27 Waatoo kaŋ a na beenaa daaru, ay goo no,
waatoo kaŋ a ga hari guusawey kaydogey daŋ,
28 waatoo kaŋ a na duulawey deeji beene,
waatoo kaŋ hari guusawey tun nda gaabi,
29 waatoo kaŋ a na teekoo kaydogey daŋ,
hala haroo masi bisa nga kaydogoo ga,
waatoo kaŋ a na laboo asaasey gorandi,
30 ay goo jeroo ga sanda goy jineboro,
ay tee nga ɲaaloo zaari ka kaa zaari,
waati kul ay ga ɲaali a jine.
31 Ay ga ɲaali nda laboo kaŋ ga borey ga goro,
ay binoo ga kan kaŋ ay goo adamizey game.»
Boraa duu gomni kaŋ ga haŋajer lakkal se
32 «Sohõ ay izʼarey, wa haŋajer ya ne,
borey duu gomni kaŋ gʼay fondawey gana.
33 Wa haŋajer hoyray se, wa duu lakkal,
war masʼa yala.
34 Boraa duu gomni kaŋ ga haŋajer ya ne,
kaŋ ga kay zaari ka kaa zaari ay hugoo miɲoo ga,
kaŋ ga goro ay hugoo miɲey carawey ga kʼa lakkal.
35 Zama boro kaŋ duu agay, duu hunayanoo,
de mo Abadantaa ga alhormo tee a se.
36 Amma boro kaŋ na zunubu tee ay ga, koyoo na nga hundoo tooɲe,
borey kaŋ ga konna agay kul si baa kala buuyan.»