9
Lakkal ga ciya borey se
Lakkal na nga hugoo cin,
a na hugoo ganji iyyaa fasal.
A na nga adabbaa koosu,
ka nga alaneb hari mooraa hanse,
a na nga ŋaadogoo mo hanse.
A na nga koŋŋey noo dontay,
nga, a ga ciya koyraa nongu jerantey ga ka nee:
«May ti boŋbii?
Boraa ma kuubi ka kaa ne!»
A ga nee boro kaŋ sii nda lakkal se:
«Wa kaa, ir ma ŋaa,
ir ma alaneb hari mooraa kaŋ ay nʼa hanse haŋ.
Wa fay nda boŋbiitaray, war ga huna,
wa koy jine fahamay fondaa ra!»
Hayaa kaŋ goo lakkalkoyni nda ɲooɲokaw game
Boro kaŋ na ɲooɲokaw hoyray ga kayna,
boro kaŋ na boro futu daŋ fondaa ra ga haw.
Masi ɲooɲokaw daŋ fondaa ra, a ga ni konnay,
lakkalkoyni daŋ fondaa ra, nʼga kan a se.
Lakkalkoyni noo hoyray, a ga duu lakkal ka tonton,
boro šerrante noo bayray, nga bayraa ga tonton.
10 Ka hunbur Abadantaa ti lakkal šintinoo,
ka boro henanantey bay manʼti kala lakkal.
11 Zama agay, lakkal bande ni aloomuroo ga boobo,
de jiiriyaŋ ga tonton ni hunaroo ga.
12 Nda ni tee lakkalkoyni, ni tiya ni boŋ se,
nda ɲooɲokaw ti ni, ni hinne no ma hayaa kaŋ goo a ra jere.
Lakkal jaŋante ga ciya borey se
13 Woy lakkal jaŋante si kay nongu foo.
Boŋbii no, a si haya kul bay.
14 A ga goro nga hugoo miɲoo ga,
a ga goro haya ga koyraa nongu jerantey ra,
15 ka bisakey cee
kaŋyaŋ goo ngi fondaa ra ka nee:
16 «May ti boŋbii?
Boraa ma kuubi ka kaa ne!»
A ga nee boro kaŋ sii nda lakkal se:
17 «Hari kaŋ boro nʼa zay haŋyanoo ga kan,
ŋaayan kaŋ boro nʼa ŋaa tuguyan ra ga kan.»
18 Boro kaŋ yadda a se si bay kaŋ nga do ti bukawey dogoo,
borey kaŋ a gʼi cee ka koy nga do sii kala alaahara guusuyaŋ ra.