1 Woy lakkalkoyni ga nga hugoo cin,

woy lakkal jaŋante ga nga hugoo kayri.

2 Boro kaŋ ga hanga fondo šerrante ga hunbur Abadantaa,

boro kaŋ ga hanga fondo golbante mmʼa kaynandi.

3 Saama, nga šenney no mʼa zukandi,

lakkalkoyney, ngi šenney no ma kay i se.

4 Nda haw sii no, alman ŋaa jinaa ga koonu,

yaaru gaabi no ma kate hegay beeri.

5 Seede laadirante si taari,

seedezooru mma taari har.

6 Ɲooɲokaw ga ceeci nga ma duu lakkal, amma a si duu a,

lakkalkoyni se bayray manʼti kala haya faala.

7 Mooru lakkal jaŋante,

zama nʼsi duu bayray miɲoo ra.

8 Boro carma lakkaloo gʼa faaba

ka nga dira takaa hawgay,

lakkal jaŋante saamataraa gʼa derandi.

9 Saama ga wanji ka hasaraa hanse kaŋ nga layboo nʼa tee,

boro šerrantey game anniya henna goo.

10 Boro binoo no ma nga binemaraa bay,

boro tana si hin ka nga ɲaaloo bay.

11 Boro futawey hugoo ga kayri,

boro šerrantey hukkumoo ga duu albarka.

12 A ga hin ka tee adamize ma tammahã

kaŋ nga goo fondoo šerrante ga,

ka gar kokoroo ti fondo kaŋ ga koy buuyan here.

13 Ba haaray ra bine ga hin ka hẽe,

ɲaaliyan kokoroo ga hin ka tee binemarayyan.

14 Boro attabiya futu ga duu nga teegoyey banaa,

boro henna mo ga duu nga teegoyey banaa.

15 Boŋbii ga yadda haya kul kaŋ i nʼa har,

boro carma ga nga dira takaa hawgay.

16 Lakkalkoyni ga hunbur, a ga mooru ifutu,

lakkal jaŋante si nga boŋ dii, a ga naanay nga boŋ.

17 Boro kaŋ binoo ga tanba ka tun ga saamataray goy tee,

boro kaŋ ga dabarifutay, borey ga konna a.

18 Saama ga lakkal jaŋantetaray tubu,

boro carmey, bayray ga tee i se kokoy fuula.

19 Boro laaley ga gunguma boro henney se,

boro futawey ga batu boro šerrantey hugey miɲey ga.

20 Talkaa, ba nga boraa gʼa hesu,

almankoyni baakey ga boobo.

21 Boro kaŋ ga nga cinaa kaynandi ga duu zunubu,

boraa duu gomni kaŋ ga hinna borey se kaŋ ga taabi.

22 Borey kaŋ ga ifutu dabari mana ngi boŋ derandi wala?

Borey kaŋ ga ihenna dabari wane borohennataray nda cimi.

23 Farayan kul goo nda nga banaa,

šenni yaada ga boro ka kaŋ talkataray ra.

24 Lakkalkoyney kokoy fuulaa manʼti kala ngi almanoo,

lakkal jaŋantey si hun ngi saamataraa ra.

25 Seede cimi ga hundi hallasi,

taari harkaw manʼti kala dargante.

26 Boro kaŋ ga hunbur Abadantaa goo naataa henna ra,

nga izey ga duu nongu kaŋ ra i ga ngi boŋ talfi.

27 Abadantaa hunburaa manʼti kala haya kaŋ ga hunayan noo

ka hun buuyan kumsawey ra.

28 Nda jamaa ga boobo, darža no kokoy se,

nda borey kacca, kaŋyan no boŋkoyni se.

29 Boro kaŋ ga suuri goo nda lakkal beeri,

boro kaŋ ga tanba ka futu ga nga lakkal jaŋaa cebe.

30 Bine kaŋ goo lakkalkanay ra ga gaaham noo hunayan,

canseyan ga hima nda dori boro biroo ra.

31 Boro kaŋ ga talka kankam na nga Takakaa kaynandi,

boro kaŋ na alhormo tee a se na nga Takakaa beerandi.

32 Boro laala, goy futaa no mʼa kaŋandi,

boro šerrante ga duu nongu kaŋ ra a ga nga boŋ tugu

ba nga buuyanoo ra.

33 Lakkal si goro kala boro bayraykoyni ra,

ba lakkal jaŋantey ga bay.

34 Šerretaray ga ganda jer,

amma zunubu manʼti kala jama haawoo.

35 Goykaw lakkalkoyni ga kan kokoy se,

nga futuroo ga kaŋ boro boŋ kaŋ ga boro haawandi.