1 Šenni henna ga bine yaynandi,

šenni laala ga boro futandi.

2 Lakkalkoyney deeney ga kate boro ma baa bayray,

lakkal jaŋantey deeney ga saamataray šenni har.

3 Abadantaa moɲey goo nongoo kul ga,

a ga boro laaley nda ihenney koroši.

4 Deene henna šenni manʼti kala tuuri kaŋ ga hunayan noo,

amma deene dargante ga hundi hasara.

5 Saama mma nga baaba hoyraa kaynandi,

boro kaŋ ga lakkal daŋ tejeyan se ga caram.

6 Alman beeri goo boro šerrante hugoo ra,

boro futu duuraa ga kate bone.

7 Lakkalkoyney miɲey mma bayray fee,

amma lakkal jaŋantey biney sii a ra.

8 Abadantaa ga konna boro futawey sargaroo,

boro šerrantey ŋaarayroo ga kan a se.

9 Abadantaa ga konna boro futu fondaa,

a ga baa boro kaŋ ga hanga šerretaray.

10 Boro kaŋ na fondaa naŋ, goojiyan cimi gʼa batu.

Boro kaŋ ga konna hoyray ga buu.

11 Alaahara nda halaciyan goo Abadantaa jine,

soko adamizey biney.

12 Ɲooɲokaw si baa i ma nga daŋ fondaa ra,

a si koy lakkalkoyney here.

13 Bine kaŋ ga ɲaali ga ndum boryandi,

nda bine ga maray, hundi ga hẽe.

14 Bine lakkalkoyni ga bayray ceeci,

lakkal jaŋantey miɲey ga saamataray šenni har.

15 Talka zaarey kul si boori,

bine kaana goo daame ra waati kul.

16 Duuray kayna nda Abadantaa hunburaa

baa alman boobo nda lakkaltunay.

17 Boro ma hubay ŋaa nongu kaŋ ra baji goo

baa haw naasa ŋaayan nongu kaŋ ra konnaray goo.

18 Boro bine konna ga citi tunandi,

boro kaŋ ga muɲe ga yenje benandi.

19 Fuyyante fondaa ga hima nda kali kaŋ teendi nda karji,

boro šerrantey fondaa manʼti kala fondo kaŋ kanandi ka boori.

20 Izʼaru lakkalkoyni ga baaboo binoo ɲaalandi,

boro lakkal jaŋante ga nga ɲaa kaynandi.

21 Saamataray ti ɲaali lakkal jaŋante se,

boro kaŋ goo nda fahamay ga dira fondo šerrante ga.

22 Goyey si boori nda borey si goro ka šelaŋ,

goyey ga hanse waati kaŋ hoyraykey ga boobo.

23 Adamize ga ɲaali nda a na zaabi henna noo,

ka šenni har nga waatoo ra ga hanse ka boori.

24 Lakkalkoyni si hanga kala hunayan fondaa kaŋ ga koy beene,

ka hun alaahara fondaa ra kaŋ goo ganda.

25 Abadantaa ga hundi beerey hugey kayri,

a ga woyoo kaŋ kurɲoo buu nongoo hawgay.

26 Abadantaa ga konna miile futay,

šenni boryo ga henan.

27 Boro kaŋ ga baa alman futu ga kate nga hugoo ga bone,

boro kaŋ ga konna sufuray tuguyan ra ga huna.

28 Boro šerrante mma miile ka zaabi,

boro laala miɲoo ga cahã šenni laala haryan ra.

29 Abadantaa ga mooru boro futu,

a ga haŋajer boro šerrantey ŋaarayroo se.

30 Ndum annuurante ga bine ɲaalandi,

alhabar boryo ga gaaham feeri.

31 Haŋa kaŋ ga maa hoyray se kaŋ ga hunayan noo,

boraa dogoo goo lakkalkoyney ra.

32 Boro kaŋ si hoyray daŋ assal mma nga boŋ kaynandi,

boro kaŋ ga maa hoyray se ga duu lakkal.

33 Abadantaa hunburaa ga boro cawandi lakkal.

Boŋ-yeeti-gandayan banda ga, beeray ga kaa.