6
Abadantaa, masʼay zukandi
1 Donkey boŋkoynoo ka woo don. Dooni kaŋ bande hooray jinay linjikoyni goo, maanaa kurbu linji yaahakoyni. Woo ti Dawda zabur foo.
2 Abadantaa, waati kaŋ ni futu, masʼay zukandi,
waati kaŋ ni binoo tun, masʼay aladabu!
3 Alhormo tee ya ne, Abadantaa, zama agay albarkaa goo ma ben,
ay noo gaaham baani, Abadantaa, zama ay birey ga jijiri.
4 Ay ga hanse ka boŋhaway.
Ni, Abadantaa, hala waati foo no woo ga ben?
5 Abadantaa, bere ay here kʼay feeri,
ay hallasi ni borohennataraa maaganda se.
6 Zama nda boro buu, a si hongu ni koyne,
alaahara ra, may ma ni saabu?
7 Ay fara ay durayyanoo sabbu se,
cijin kul, ay mundawey gʼay daaroo tayandi,
ay gʼay daaroo haŋandi nda ay mundawey.
8 Ay moɲey ton dooray maaganda se,
i žen ay torrokey maaganda se.
9 Wa mooru agay, war kul kaŋ ga šerretaray jaŋay tee!
Zama Abadantaa maa ay hẽenoo jindoo,
10 Abadantaa maa ay suurandiyanoo se,
Abadantaa nʼay ŋaarayroo taa.
11 Agay iberey kul ga haw, biney ga dunbu,
dogoo din da i kul haw, i yee banda.