7
Irkoy ga nga borey hallasi ngi iberey ra
1 Woo ti Dawda binehẽeni dooni foo kaŋ a nʼa dunbu Abadantaa se Benžameŋ boraa Kuš ga.
2 Abadantaa, ay Koyoo, ni ga ay ga talfi,
ay soolam kʼay kaa ay gaaraykey kul ra,
3 i masʼay kottu,
sanda ganjihayla kaŋ ga dunba, boro kul si faaba!
4 Abadantaa, ay Koyoo, nda ay na hayaa tee kaŋ i gʼa har,
nda ay kabey na goy futu tee,
5 nda ay na ifutu tee boraa se kaŋ alaafiya goo agay nda a game,
nda ay nʼay torrokaa kabehayaa taa bila addalil,
6 yala iberoo mʼay gaarandi kʼay dii,
yala a mʼay kaŋandi kʼay taama,
yala a mʼay daržaa birji laboo ra.
Kay-kayna
7 Abadantaa, tun ni futuroo ra!
Tun ay torrokey kaŋ gʼay gurzugay futuroo ga!
Kay kʼay faaba, ni kaŋ na šerretaray yaamar.
8 Yala gandawey kul jamaa ma kaa ka ni kuubi!
Ni goo beene, nʼga ni hinoo cebe i se.
9 Abadantaa ga gandawey ciiti.
Abadantaa, ay noo ay cimoo,
ka sawa nda ay šerretaraa nda ay laadirtaraa.
10 Ay gʼa wiri ni ga, goy futawey kaŋ boro laaley gʼi tee, mʼi kayandi,
boro šerrante tabatandi,
ni kaŋ ga adamize binoo nda lakkaloo laasaabu, Irkoy šerrantaa.
11 Ay koraa sii kala Irkoy jere
kaŋ ga borey kaŋ biney ga šerre hallasi.
12 Irkoy manʼti kala ciitikaw šerrante,
Koy no kaŋ ga hin ka futu zaari kul.
13 Nda boro mana nimsi, Irkoy ga nga takubaa miɲoo kaanandi,
a ga nga biraa soolu kʼa neeši.
14 A ga nga wongu jinawey kaŋ ga wiiya soolu a se,
a ga nga biraw-izey diinandi.
15 Boro laala ga ifutu miile,
a ga bone gunde zaa, a ga taari hay.
16 A ga guusu kuku fanši,
de mo a kaŋ guusoo ra kaŋ nga hunday nʼa tee.
17 Bonaa kaŋ a nʼa soolu kaŋ boŋoo boŋ,
nga laalaroo ga kaŋ boŋgaasoo boŋ.
18 Ay ga albarkaa tee Irkoy se nga šerretaraa maaganda,
ay ga don Abadantaa, Koy Jerantaa maaɲoo se.