9
Irkoy ti borey kaŋ ga taabi faabakaa
1 Donkey boŋkoynoo ka woo don. Dooni kaŋ bande gaasu nda kurbu goo. Woo ti Dawda zabur foo.
2 Ay ga Abadantaa saabu nda ay binoo kul.
Ay ga ni teegoy kayfantey kul filla.
3 Ay ga ɲaali ka yafarhã ni maaganda,
Koy Jerantaa, ay ga don ni maaɲoo se.
4 Waati kaŋ agay iberey yee banda,
i ga kaŋ, i ga dere ni jine.
5 Zama ni kay ya ne,
nʼnʼay noo ay cimoo.
Ni goro kokoy gorodogoo ra,
ni kaŋ ga ciiti nda šerretaray.
6 Ni zahã gandawey ga, nʼna boro laaley derandi,
nʼna maaɲey tuusu hala abada.
7 Iberey sii no koyne, i kayri hala abada!
Koyrayaŋ kaŋ nʼnʼi tunandi,
borey si yee ka hongu ey.
8 Abadantaa ga goro kokoytaraa ra hala abada,
a ga nga kokoy gorodogoo gorandi ciitoo se.
9 Nga, a ga aduɲɲa ciiti nda šerretaray,
a ga jamawey ciiti nda fondaa.
10 Abadantaa ti borey kaŋ i gʼi šiita wakkalkaa,
a ga tee i se nongu kaŋ ra boro ga talfi waati šendey ra.
11 Borey kaŋ ga ni maaɲoo bay ga ngi naanaa daŋ ni ra,
zama nʼsi borey yankar kaŋ ga ni ceeci, Abadantaa.
12 Wa don ka Abadantaa saabu kaŋ ga goro Siyoŋ koyraa ra,
wa nga teegoyey har jamawey ra.
13 Zama a ga boro banandi kaŋ na kuri mun,
a ga hongu ey,
a mana dirɲa borey kaŋ ga taabi wurroo.
14 Alhormo tee ya ne, Abadantaa,
ay taabiyanoo guna kaŋ agay iberey gʼa tee ya ne,
ni kaŋ gʼay žigandi ka hun buuyan miɲoo ga,
15 hala ya ni beeraa kul har.
Woy-izoo kaŋ ti Siyoŋ koyraa miɲey ga,
ya duu hallasiroo ɲaaloo kaŋ ga hun ni do.
16 Gandawey kaŋ guusoo ra kaŋ i nʼa tee,
ngi cewey kaŋ sankaa ra kaŋ i tugu kʼa daaru.
17 Abadantaa na nga boŋ cebe,
a na ciiti dunbu.
Boro laaley ga kaŋ kumsaa ra kaŋ kabey nʼa tee.
Hooray jinawey hinne no ma hẽe.
Kay-kayna
18 Boro laaley ga bere alaahara,
maanaa gandawey kul kaŋ dirɲa Irkoy.
19 Zama manʼti waati kul no alfukaaroo ga dirɲandi,
borey kaŋ ga taabi naataa si dere hala abada.
20 Tun Abadantaa, adamize masi hin!
Gandawey ma ciitandi ni jine.
21 Abadantaa, hunburay daŋ i ra,
jamawey ma bay kaŋ ngi manʼti kala adamize.
Kay-kayna