1 Abadantaa, macin se nʼga mooru ay ga?

Macin se nʼga tugu ya ne waati šendey ra?

2 Boro laalaa bolsayyanoo ra, a ga alfukaarey gaarandi,

a ga kaŋ anniyawey ra kaŋ i nʼi kanandi.

3 Boro laalaa ga fooma nda hayaa kaŋ a ga bagʼa,

albahiiri ga Abadantaa wow, a gʼa ɲooɲo.

4 Boro laalaa ga deenebeeray ka nee: «A si boro zukandi.

Irkoy si bara.» Woo ti hayaa kul kaŋ a gʼa hongu.

5 Waati kul nga hayey ga duu fondo,

ni ciitey ga hanse ka mooru ka toorʼa,

a ga nga nkuwawey kul funsu kʼi derandi.

6 A ga nee nga boŋ se: «Ay si kaŋ,

zaman ka kaa zaman bone si duu agay!»

7 Miɲoo ga too nda dangayaŋ, nda zanbayaŋ, nda šiitayanyaŋ,

deenoo ga laala, a ga futu.

8 A ga zanbaguusu tee koyra kanbey jere,

tuguyan ra a ga boro kaŋ mana haya kul tee wii,

moɲey ga talkey ceeci.

9 A ga zanbaguusu tee nga tugudogoo ra

sanda ganjihayla kaŋ goo hawsa tefayantaa ra,

a ga lanba ka ceeci ka kaŋ alfukaaroo ga.

A ga kaŋ alfukaaroo ga kʼa ka koy nga sankaa ra.

10 A ga gunguma, a ga sonbu,

talkey ga kaŋ nga hinoo cire.

11 A ga nee nga boŋ se: «Irkoy mma dirɲaw.

A ga nga ndumoo daabu, waati kul a si dii.»

12 Tun, Abadantaa!

Irkoy, ni kaboo jer!

Masi dirɲa borey kaŋ ga taabi!

13 Macin se boro laala ga Irkoy kaynandi?

Macin se a ga nee nga boŋ se: «Irkoy si boro zukandi?»

14 Ni hunday dii binemarayyanoo nda šiitaroo,

nʼga guna ka huga nda takaa,

ni ga talkaa ga talfi,

ni no ma alyatimoo faaba.

15 Ma boro laala futaa hinoo kayri,

ma nga futuroo zukandi, boro masi yee ka dii a!

16 Abadantaa ti Kokoy waati kul hala abada,

jamayaŋ jerey halaci nga gandaa ra.

17 Abadantaa, nʼga haŋajer borey se kaŋ ga taabi,

nʼga biney daŋ, nʼga haŋa kayandi i se,

18 ka ciiti dunbu alyatimoo se nda boraa se kaŋ i gʼa šiita,

hala laboo ga, boro kul masi yee koyne ka boro hunburandi.