22
Ay Koyoo, macin se nʼnʼay naŋ?
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Alfazar jeeri». Woo ti Dawda zabur foo.
2 Ay Koyoo, ay Koyoo, macin se nʼnʼay naŋ?
Macin se nʼga mooru ay ga?
Macin se nʼsʼay hallasi?
Macin se nʼsi maa ay wurroo se?
3 Ay Koyoo, zaaroo ra ay ga wurru ka ni cee, nʼsi zaabi,
cijinoo ra ay ga wurru ka ni cee, ay si dangay.
4 Ka gar, ni ti Koy henanantaa,
nʼsi goro kala Izirayel borey saabuyaney game.
5 Ni ra ir baabey na ngi naanaa daŋ,
i naanay ni, nʼnʼi hallasi.
6 I wurru ka ni cee, nʼnʼi kaa kabe,
i na ngi naanaa daŋ ni ra, i mana haw.
7 Agay, nooni ti agay, ay manʼti adamize,
adamizey gʼay wow, ay jamaa gʼay kaynandi.
8 Boro kul kaŋ dii agay, gʼay haari-haari ,
i ga mee daŋ ay ga, i ga ngi boŋey zinji-zinji ka nee:
9 «A ma nga misoo talfi Abadantaa ga.
Abadantaa mʼa kaa,
a mʼa hallasi, zama Abadantaa ga bagʼa.»
10 Ni kʼay kaa ay ɲaa gundoo ra,
nʼnʼay naŋ ay ɲaa fafaa ga kʼay lakkaloo kanandi.
11 Za ay hayandi, ni ga ay talfandi,
za ay ɲaa gundoo ra ay Koyoo ti ni.
12 Masi mooru agay waati kaŋ šiitay kaa ay ga,
zama boro kul sʼay faaba!
13 Yaaru booboyaŋ gʼay kuubi kʼay bere,
Bašaŋ gandaa adabba gaabikoyniyaŋ gʼay wanga.
14 I ga ngi miɲey hay ay ga
sanda ganjihayla kaŋ ga kaati ka koy hoo.
15 Ay ga doo sanda hari,
ay birey kul ga say-say,
ay binoo ga hima nda suma,
ma nee a mma menne ay ra.
16 Ay gaaboo kogu sanda labudiini,
ay deenoo ga denji ay dankaa ga,
nʼgʼay tee sanda buuyan labu.
17 Zama hanšiyaŋ gʼay kuubi kʼay bere,
goy futu teekawyaŋ jamaa gʼay wanga,
i gʼay kabey nda ay cewey fun.
18 Ay ga hin kʼay birey kul kabu,
i gʼay guna, ay ga tee i se sanda gunahaya.
19 I gʼay bankaarawey zamna,
i ga alkurra kar ay darbaa ga.
20 Ni, Abadantaa, masi mooru ay ga!
Ni kaŋ ti ay gaaboo, cahã ka kaa kʼay faaba!
21 Ay hundoo hallasi takubaa ra,
ay hundi follokaa hallasi hanšey kabey ra!
22 Ay hallasi ganjihaylaa miɲoo ra
nda ganjihawoo hilley ra!
Nʼnʼay zaabi!
23 Ay ga ni maaɲoo har agʼarmey se,
ay ga ni saabu margaroo game.
24 War kaŋ ga hunbur Abadantaa, wʼa saabu!
War kul kaŋ ti Yakuba hayroo, wa daržaa daŋ a ga!
Wa jijiri jinoo ra, war kul kaŋ ti Izirayel ize!
25 Zama talkaa taabiyanoo ra, a si konna a, a sʼa fur,
a si nga ndumoo tugu a se,
nda a kaati ka faaba ceeci a ga, a ga haŋajer.
26 Ni do ay saaburey ga hun margari beeroo game.
Meefurey kaŋ ay nʼi zaa, ay gʼi bana borey kaŋ ga hunbur Abadantaa jine.
27 Borey kaŋ ga taabi ga ŋaa, i ga kungu,
borey kaŋ ga Abadantaa ceeci gʼa saabu.
Yala ni hundoo ma huna hala abada!
28 Laboo kanjey kul ga hongu Abadantaa, i ga bere a here.
Jamawey alaayan beerey ga sujudu ni jine.
29 Zama laama manʼti kala Abadantaa wane,
gandawey goo nga hinoo cire.
30 Laboo gaabikoyney kul ga ŋaa ka sujudu a jine,
nga jine, borey kul ga sujudu kaŋ ga kaa ka huru laboo cire,
wey kaŋ si hin ka ngi hundey ganji buuyan.
31 Ngi hayrey kaŋ goo kaa ga kaa kʼa gana,
i gʼir Koyoo šennoo har alwaddaa kaŋ ga kaa borey se.
32 I ga kaa ka nga šerretaraa har jamaa se kaŋ ga kaa,
zama a na teegoy tee i game.