Laboo nda haya kul kaŋ goo a boŋ manʼti kala Abadantaa wane,

nga wane nda aduɲɲa nda boro kul kaŋ ga goro a ra.

2 Zama nga ka laboo gorandi teekoyaŋ boŋ,

nga kʼa tabatandi isayaŋ boŋ.

3 May no ma žigi Abadantaa tondi hondoo boŋ?

May no ma hin ka kay nga nongu henanantaa ra?

4 Kala a ma tee boro kaŋ kabey ga henan, binoo ga kaaray,

a si nga hundoo noo taari se, de mo a si žee ka darga.

5 Boraa woo ga duu Abadantaa albarkaa,

nda šerretaray nga Koyoo do kaŋ nʼa hallasi.

6 Borey kaŋ ga Abadantaa ceeci,

wey kaŋ ga nga ndumoo ceeci, ngi ti Yakuba.

7 Koyraa miɲey, wa war boŋey jer!

Wa war boŋ jer, hugu mee abadantey!

Kokoy daržantaa ma huru!

8 May ti kokoy daržantaa woo?

Abadantaa no, nga kaŋ ti Gaabikoyoo, nga ti Wongaaroo,

Abadantaa ti wongoo Wongaaroo.

9 Koyraa miɲey, wa war boŋey jer!

Wa war boŋ jer, hugu mee abadantey!

Kokoy daržantaa ma huru!

10 May ti kokoy daržantaa woo?

Abadantaa, Aduɲɲakoyoo no,

nga ti Kokoy daržantaa!