Abadantaa, ay gʼay binoo manandi ni.

2 Ay Koyoo, ni ra ay nʼay naanaa daŋ, masi naŋ ya haw.

Yala agay iberey masi haaru ay ra!

3 Boro kul kaŋ ga tammahã ni ra si haw,

borey ga haw kaŋ ti zanbante bila addalil.

4 Abadantaa, ni fondawey bayrandi ya ne,

ay waanandi takaa kaŋ nda ay ga hima ka dira.

5 Ay dirandi ni cimoo fondaa bande kʼay cawandi,

zama ni ti ay Hallasikaa,

ni ra ay ga tammahã zaaroo kul.

6 Abadantaa, hongu ni tamallaa nda ni borohennataraa,

zama i ga bara za zaman.

7 Masi hongu ay zankataraa zunubey nda ay tureyaney,

Abadantaa, hongu agay ka sawa nda ni borohennataraa

ni alhormaa maaganda se!

8 Abadantaa ga boori a ga šerre,

woo se a ga fondaa cawandi zunubantey se.

9 A ga borey kaŋ ga ngi boŋ yeeti ganda dirandi šerretaray ra,

a ga nga fondaa cawandi i se.

10 Abadantaa fondawey kul ti borohennataray nda cimi

borey se kaŋ ga nga amaanaa nda nga seedetarawey dii.

11 Ni maaɲoo maaganda se, Abadantaa,

nʼgʼay layboo yaafa ya ne, zama a ga boobo.

12 May ti boraa kaŋ ga hunbur Abadantaa?

A ga fondaa har a se kaŋ a ga hima kʼa suuba.

13 A ga goro gomni ra,

nga hayroo ga gandaa mayray.

14 Abadantaa si nga sirrey har kala nga hunburkey se,

a gʼi bayrandi nga amaanaa.

15 Waati kul ay moɲey sii kala Abadantaa here,

zama nga no mʼay cewey kaa sankaa ra.

16 Ɲeli ay ga, ma alhormo tee ya ne,

zama agay foo no, de mo ay ga taabi!

17 Ay binoo ga koy de a ga dor,

ay fattandi ay gurzugawey ra!

18 Ay taabiyanoo nda ay zaraboo guna,

ay zunubey kul yaafa.

19 Guna takaa kaŋ nda agay iberey ga boobo,

konnay futaa guna kaŋ nda i ga konna agay.

20 Ay hunaroo hawgay, ay feeri!

Masi naŋ ya haw,

zama ni ga ay ga talfi!

21 Yala laadirtaray nda šerretaray ma kay ya ne,

zama ay ga tammahã ni ga.

22 Irkoy, Izirayel feeri

ka hun nga šiitayaney kul ra!