Abadantaa ti ay gaayoo, nga ti ay hallasiroo.

May no ay ga hunbur a?

Abadantaa ga ay hundoo ga talfi,

may jine ay ga jiti?

2 Nda goy futu teekawyaŋ man agay

ka ceeci kʼay halaci, kʼay kunturoo ŋaa,

ay torrokey nda agay iberey,

ngi no ma tatanji ka kaŋ.

3 Ba nda wongu jama na ngi kaloo sinji kʼay wongu,

ay binoo si hunbur,

ba nda wongu tun ya ne,

ay lakkaloo ga kani.

4 Haya folloku no ay nʼa wiri Abadantaa ga, ay nʼa ceeci a ga:

ay hunaroo kul ya cindi Abadantaa hugoo ra,

ka dii Abadantaa booroo

kʼa gaaya nga hugoo ra.

5 Zama bone zaari hane, a gʼay tugu nga tendaa cire,

a gʼay tugu nga hukkumoo gundoo ra,

a gʼay gorandi tondi boŋ, haya kul masi duu agay.

6 Sohõ ay gʼay boŋoo jer ka bisa agay iberey kaŋ gʼay kuubi kʼay bere,

ay ga cilili ka sargariyaŋ kaa Abadantaa se nga hukkumoo ra,

ay ga don ka Abadantaa saabu nda zaburyaŋ.

7 Abadantaa, haŋajer ya ne, ay gʼay jindoo jer ka ni cee,

alhormo tee ya ne, mʼay zaabi!

8 Ay ga honga kaŋ ni nee: «Wa agay ndumoo ceeci!»

Ay ga ni ndumoo ceeci, Abadantaa!

9 Masi ni ndumoo tugu ya ne,

masi agay, ni tamoo gaaray nda futay,

ni ti ay faabakaa,

masʼay naŋ, masʼay yala,

Irkoy kaŋ ti ay Hallasikaa!

10 Ba nda ay baabaa nda ay ɲaa nʼay naŋ,

Abadantaa gʼay dii.

11 Abadantaa, ni fondaa cawandi ya ne,

ay hangandi fondo šerrantaa bande,

agay iberey maaganda se.

12 Masʼay tee borey kaŋ ga konna agay saku,

zama taari seedeyaŋ tun ya ne,

šenni laalayaŋ no ma hun i ra.

13 Macin no ay ga ti a,

nda a gar ya nka si naanay ka dii Abadantaa borohennataraa

hundikoyney laboo ga?

14 Ni tammahãa daŋ Abadantaa ra!

Gaabi daŋ ni boŋ ra, ma bine tee!

Ni tammahãa daŋ Abadantaa ra!